ការដាក់បញ្ចូល រមៀត និងទឹកដោះគោចូលគ្នា សម្រាប់ទទួលទានជាមួយនឹងរបបអាហារប្រចាំថ្ងៃរបស់អ្នកគឺវាពិតជាល្អណាស់ចំពោះសុខភាពរាងកាយទាំងមូល ដែលអ្នកគួរស្វែងយល់ ព្រោះរមៀតជាឱសថធម្មជាតិក្នុងការការពារពីជំងឺផ្សេងៗ។ ចំណែកឯទឹកដោះគោ គឺជាប្រភពដ៏សម្បូរបែបនៃជាតិកាល់ស្យូម ដែលអាចជួយឆ្អឹងឲ្យមានសុខភាពល្អ និងរឹងមាំ។
ខាងក្រោមនេះយើងខ្ញុំនឹងបង្ហាញលោកអ្នកពីវិធីធ្វើទឹកដោះគោរមៀត និងអត្ថប្រយោជន៍ដ៏អស្ចារ្យរបស់វាចំពោះរាងកាយ និងសុខភាព៖
គ្រឿងផ្សំ៖
ទឹកដោះគោស្រស់ ១កែវ
ម្សៅរមៀត កន្លះស្លាបព្រាកាហ្វេ
ទឹកឃ្មុំ ១ស្លាបព្រាកាហ្វេ
ការអនុវត្តន៍៖ ដាក់ឆ្នាំងចាក់ទឹកដោះគោ ដាក់ម្សៅរមៀតចូល កូរឲ្យសព្វទុករម្ងាស់ប្រហែល ៣០វិនាទី។ យកទឹកដោះនេះ ចាក់ចូលកែវ បើមិនចង់ដោយកាក ចាក់ច្រោះវា រួចដាក់ទឹកឃ្មុំចូល កូរឲ្យសព្វ ដើម្បីបន្ថែមរសជាតិ រួចហូប។ ហូបពេលក្តៅឧណ្ហៗ ហូប ១កែវ ជារៀងរាល់ថ្ងៃ មុនពេលចូលគេង។
អត្ថប្រយោជន៍ដ៏អស្ចារ្យចំពោះរាងកាយ និងសុខភាព៖ ជួយឲ្យគេងលក់ស្រួល, ជួយសម្អាតជាតិពុលចេញពីរាងកាយ, ជួយព្យាបាលជំងឺសន្លាក់ និងធ្វើឲ្យឆ្អឹងរឹងមាំ, ជួយបង្កើនប្រព័ន្ធភាពស៊ាំ, ធ្វើឲ្យស្បែករបស់អ្នកភ្លឺថ្លា។
លើសពីនេះ វានៅជួយសម្រកទម្ងន់, ព្យាបាលជំងឺផ្តាសាយ និងក្អក, ជួយសម្រួលដល់បញ្ហាឈឺក្បាល, ព្យាបាលការឈឺចាប់ពេលមកឈាមរដូវ៕
