នៅក្នុងអំឡុងពេលរដូវក្តៅ ប្រិយមិត្តជាច្រើនប្រាកដជាព្រួយបារម្ភពីសម្រស់ស្បែកមិនស្អាតដោយសារត្រូវនឹងកម្តៅថ្ងៃក្តៅខ្លាំង។ តែទោះបីជាយ៉ាងណា យើងនៅមានរូបមន្តធ្វើដោយដៃយ៉ាងមានប្រសិទ្ធិភាពមួយដែលអាចជួយរក្សាភាពត្រជាក់ដល់ស្បែកលោកអ្នករហូតក្នុងអំឡុងថ្ងៃក្តៅខ្លាំង ហើយស្បែកនឹងកាន់តែម៉ត់រលោងតាមបែបធម្មជាតិទៀតផង។
អ្នកត្រូវការគ្រឿងផ្សំដូចជា៖
ម្សៅឈើអែម ១ ស្លាបព្រា
សាច់ប្រទាលកន្ទុយក្រពើ ៣ ស្លាបព្រា
ទឹកកូឡាប ១ស្លាបព្រា
ថ្នាំវីតាមីន C ១គ្រាប់
ការរៀបចំ៖ ដាក់ម្សៅឈើអែមចូលទៅក្នុងចានមួយ ហើយដាក់ទឹកផ្កាកូឡាបចូល។ បន្ទាប់មកសម្រិតយកតែទឹករបស់វាដាក់ចូលក្នុងចានមួយផ្សេងទៀត។ ជាបន្តសូមដាក់សាច់ប្រទាលកន្ទុយក្រពើ និងកិនគ្រាប់ថ្នាំវីតាមីន C ចូល។ ច្របល់គ្រឿងផ្សំទាំងអស់បញ្ចូលគ្នាឱ្យបានសព្វល្អ។
វិធីប្រើ៖ លាងសម្អាតផ្ទៃមុខរបស់អ្នកនឹងទឹកឱ្យបានស្អាតសិន រួចយកចង្អុលដៃជ្រលក់ចូលក្នុងសេរ៉ូមខាងលើបន្តិច បន្ទាប់មកលាបពេញលើផ្ទៃមុខរបស់អ្នក និងម៉ាស្សារយៈពេល ២ ទៅ ៣ នាទី។ បន្ទាប់ពីនេះលាងសម្អាតស្បែកមុខអ្នកនឹងទឹកក្តៅឧណ្ហៗ ហើយជូតឱ្យស្ងួត។ នៅចុងបញ្ចប់អ្នកត្រូវប្រើក្រែមសំណើមធម្មជាតិជាការស្រេច។
ជាការពិត មានមនុស្សជាច្រើនបានអះអាងថា រូបមន្តមួយនេះពិតជាអាចធ្វើឱ្យផ្ទៃមុខអ្នកសម៉ត់រលោងមែន។ ប្រសិនបើអ្នកចង់បានស្បែកមុខស្អាតគួរឱ្យទាក់ទាញ កុំភ្លេចសាកល្បងទាំងអស់គ្នា៕