ពិតមែនហើយ ការទទួលទានអាហារកែច្នៃច្រើន អាចធ្វើឲ្យបំពង់រំលាយអាហាររបស់យើងមានភាពអសកម្ម រលាក និងនឿយហត់។ ទោះជារាងកាយរបស់យើង មានប្រព័ន្ធកម្ចាត់ជាតិពុលចេញពីរាងកាយក្តី ប៉ុន្តែដើម្បីគាំទ្រដល់ដំណើរការបន្សាបជាតិពុលនេះ អាហារបំបាត់ជាតិពុល ជាវិធីដ៏ល្អមួយ។ តើអាហារទាំងនោះមានអ្វីខ្លះ?
ទឹកផ្លែឈើ និង បន្លែស្រស់៖ ការញ៉ាំទឹកផ្លែឈើ និង បន្លែស្រស់ចំនួនពីរបីកែវ អាចជួយផ្ដល់សារធាតុចិញ្ចឹមចាំបាច់ និងជាតិសរសៃដែលល្អចំពោះសុខភាពពោះវៀន ព្រមទាំងជួយពង្រឹងដល់បំពង់រំលាយអាហារ។ ប៉ុន្តែយើងមិនគួរញ៉ាំទឹកផ្លែឈើ ឬបន្លែនៅក្នុងរយៈពេលវែងឡើយ ពីព្រោះការលាងសម្អាតប្រព័ន្ធរំលាយអាហារលើសពី៣ថ្ងៃ អាចបណ្ដាលឲ្យមនុស្សមួយចំនួនទទួលផលប៉ះពាល់ ដោយបាត់បង់សារធាតុចិញ្ចឹមសំខាន់ៗ ដូចជាប្រូតេអ៊ីន និងខ្លាញ់ ព្រមទាំងធ្វើឲ្យបាត់បង់សាច់ដុំ កាត់បន្ថយមុខងារខួរក្បាលនិងរំខានដល់អ័រម៉ូនផងដែរ។
អាហារជាតិសរសៃ៖ ជាមួយគ្នានេះដែរ អាហារជាតិសរសៃគឺជាសមាសធាតុសំខាន់ក្នុងការសម្អាត ពីព្រោះវាជួយឲ្យរាងកាយរបស់យើងកម្ចាត់ចោលកាកសំណល់បានយ៉ាងរហ័ស។ ជាតិសរសៃស្រូបយកទឹក ដើម្បីពង្រីកនិងជួយដល់ពោះវៀនតូចផ្នែកខាងក្រោម ដើម្បីបណ្ដេញកាកសំណល់ចេញមកក្រៅ។ រីឯអាហារដែលមានជាតិសរសៃខ្ពស់មានដូចជាផ្លែក្រូច សារី បឺរ ត្រសក់ស្រូវ ផ្កាខាត់ណាខៀវ ការ៉ុត សណ្ដែក គ្រាប់ធញ្ញជាតិ និងគ្រាប់ពូជជាដើម។
ប្រូបាយអូទិក៖ ប្រូបាយអូទិកគឺជាបាក់តេរីល្អដែលចាំបាច់សម្រាប់ការរំលាយអាហារត្រឹមត្រូវ។ ពួកវាក៏អាចជួយសម្អាតបំពង់រំលាយអាហារផ្នែកខាងក្រោម និងស្ដារសុខភាពប្រព័ន្ធរំលាយអាហារឲ្យល្អឡើងវិញ។ បាក់តេរីប្រូបាយអូទិករួមបញ្ចូលAcidophilus និង Bifidus ដែលមាននៅក្នុងទឹកដោះគោជូរ និងអាហារដែលផ្សំពីសណ្ដែក។
ក្រៅពីការទទួលទានអាហារបំបាត់ជាតិពុលខាងលើហើយ យើងគប្បីកាត់បន្ថយអាហារកែច្នៃ គ្រឿងស្រវឹង និងការជក់បារីផងដែរ ដើម្បីជួយឲ្យប្រព័ន្ធរំលាយអាហារមានភាពប្រសើរឡើងមកវិញ៕
