ទល់នោម ឬហៅថានោមទាស់នោះ គឺជាជំងឺម្យ៉ាង ដែលមានទឹកនោមក្នុងប្លោកនោម តែអ្នកជំងឺនោមមិនចេញ ដែលធ្វើឱ្យមានការឈឺចុកចាប់នៅពេលដែលចង់នោម។ ការនោមទាស់នេះច្រើនតែកើតឡើងលើបុរសវ័យចំណាស់ ដោយសារតែក្រពេញប្រូស្តាតរីកធំ ប៉ុន្តែ ទាំងបុរសគ្រប់វ័យ និងស្រ្តី ក៏អាចជួបបញ្ហានោមទាស់ដែរដោយសារតែហេតុផលដូចខាងក្រោមនេះ៖
ការបង្ករោគនៅផ្លូវទឹកម៉ូត្រ
ជំងឺកាមរោគ
គ្រួសក្នុងតម្រងនោម ឬប្លោកនោម
ខូចសរសៃប្រសាទដោយសារតែជំងឺទឹកនោមផ្អែម ដាច់សរសៃឈាមខួរក្បាល ឬការបាក់បែក
ដុំសាច់ដែលធ្វើឲ្យស្ទះ
ការវះកាត់នៅផ្លូវទឹកម៉ូត្រ
កំពុងតែប្រើថ្នាំផ្តាសាយ
ស្រ្តីមានផ្ទៃពោះ និងសម្រាលកូន
ស្រ្តេស និងបញ្ហាផ្លូវចិត្ត
យ៉ាងណាមិញ មានវិធីសាស្រ្តព្យាបាលដោយខ្លួនឯងច្រើនណាស់ដែលអ្នកអាចសាកល្បងបានដើម្បីដោះស្រាយបញ្ហានោមទាស់មួយនេះដូចជា៖
បន្ថយស្រ្តេស ឬការថប់អារម្មណ៍៖ ការដែលឧស្សាហ៍នោមទាស់ អាចកើតឡើងដោយសារតែមនុស្សយើងស្រ្តេស ឬថប់អារម្មណ៍ច្រើនពេក។ ការដែលមានអាការៈបែបនេះអាចធ្វើឲ្យសាច់ដុំតឹងជាប់រួមទាំងសាច់ដុំគ្រប់គ្រងប្លោកនោមដែរ។ យ៉ាងណាមិញ អ្នកគួរតែបន្ថយស្រ្តេស ឬការថប់អារម្មណ៍តាមរយៈការបន្ធូរអារម្មណ៍ និងរាងកាយដូចជា ដកដង្ហើមជ្រៅៗ និងយឺតៗ ហាត់យូហ្គា ឬតាំងសមាធិ ស្តាប់ចម្រៀង ជាដើម។
ញ៉ាំទឹកបណ្តើរ ព្យាយាមនោមបណ្តើរ៖ មនុស្សមួយចំនួនបានប្រាប់ថា ការនោមរបស់ពួកគេពិតជាមានប្រសិទ្ធភាពមែនក្រោយពីព្យាយាមនោមបណ្តើរ ញ៉ាំទឹកតិចៗបណ្តើរ។ ពិតណាស់ វានឹងជួយច្រើនបើសិនជាក្នុងប្លោកនោមកំពុងតែពេញទឹកនោមហើយ។ បើសិនជាអ្នកសង្ស័យថា ការនោមទាស់របស់អ្នកកើតឡើងដោយសារតែការខ្សោះជាតិទឹក យកល្អគួរតែព្យាយាមញ៉ាំទឹកឲ្យបានច្រើនជៀសជាងការញ៉ាំភេសជ្ជៈអ្វីផ្សេង។
ធ្វើលំហាត់ប្រាណ៖ អ្នកអាចប្រើវិធីដើរលឿនៗ រយៈពេលពីរបីនាទីបើសិនជាអ្នកកំពុងតែជួបបញ្ហានោមទាស់ និងត្រូវការនោមខ្លាំង ព្រោះវិធីនេះនឹងជួយជម្រុញដល់ទំនាញផែនដីដើម្បីធ្លាក់ទឹកនោម។
ទោះយ៉ាងណា បើអ្នកសាកល្បងវិធិសាស្ត្រខាងលើហើយនៅតែមិនមានប្រសិទ្ធភាព គួរតែប្រញាប់ទៅជួបជាមួយគ្រូពេទ្យឯកទេស ដើម្បីពិនិត្យ និងធ្វើការព្យាបាល។ ចំពោះការព្យាបាលនេះ គឺងាយបំផុត ដែលគ្រាន់តែធ្វើឱ្យទឹកនោមចេញមកក្រៅទៅតាមបច្ចេកទេសរបស់គ្រូពេទ្យ៖
ដាក់ទុយោសុងទឹកនោម ដើម្បីឱ្យនោមចេញ។
នៅពេលដែលដាក់សុងទឹកនោមហើយ នៅតែមិនអាចឱ្យទឹកនោមចេញមកក្រៅបាន អ្នកឯកទេស និងធ្វើការចោះបង្ហូរតាមថ្ងាសដើម្បីឱ្យទឹកនោមហូរចេញមកក្រៅ ដែលធ្វើឱ្យអ្នកជំងឺបានធូរស្បើយយ៉ាងឆាប់រហ័ស។
ដូចនេះអ្វីដែលល្អបំផុតសម្រាប់អ្នកនោះ គឺនៅពេលដែលមានអារម្មណ៍ថា ពិបាកនោម នោមចេញមកតិច លោកអ្នកគួរតែប្រញាប់ទៅធ្វើការព្យាបាល ឬក៏មកពិគ្រោះជាមួយគ្រូពេទ្យឱ្យបានទាន់ពេលវេលា ចៀសវាងកើតមានដំណាក់កាលធ្ងន់ធ្ងរ៕