ប្រសិនបើលោកអ្នកកំពុងស្វែងរករូបមន្តដែលជួយបំបាត់បញ្ហាបបូរមាត់ខ្មៅ ស្ងួត គ្រើមតាមវិធីធម្មជាតិ អញ្ចឹងគឺអ្នកមកត្រូវកន្លែងហើយ។ ប្រធានបទរបស់យើងខ្ញុំនាពេលនេះសូមលើកឡើងពីវិធីសាស្ត្រធម្មជាតិងាយៗ ដើម្បីបញ្ចប់កង្វល់នៃបបូរមាត់ខ្មៅរបស់អ្នក ដោយអ្នកអាចអនុវត្តបាននៅផ្ទះ អស់ថវិកាតិច តែប្រសិទ្ធភាពខ្ពស់ណាស់។
ទឹកក្រូចឆ្មា៖ ដោយសារតែអាស៊ីតស៊ីទ្រិចក្នុងក្រូចឆ្មា អាចជម្រុះស្នាមខ្មៅលើបបូរមាត់បាន។ លាយទឹកក្រូចឆ្មា២ស្លាបព្រាជាមួយទឹកឃ្មុំ ហើយលាបលើបបូរមាត់ ទុកប្រហែល១០នាទី រួចលាងទឹកចេញ។ លាបបែបនេះយ៉ាងហោចណាស់៣ដងក្នុងមួយអាទិត្យ នោះអ្នកនឹងឃើញលទ្ធផល។
ទឹកដោះគោស្រស់៖ យកទឹកដោះគោ ២ទៅ៣ តំណក់ជ្រលក់ជាមួយសំឡីផ្ដិតលើបបូរមាត់ប្រហែល ៥នាទីរួចលាងទឹកចេញ។ វានឹងជួយបំបាត់ស្នាមខ្មៅលើបបូរមាត់បាន ព្រមទាំងជម្រុះកោសិកាចាស់ៗលើបបូរមាត់ថែមទៀត។ អនុវត្តរាល់ថ្ងៃ ដើម្បីឆាប់ទទួលប្រសិទ្ធភាព។
ទឹកត្រសក់៖ វាមានផ្ទុកដោយសារធាតុធម្មជាតិ ជួយឲ្យបបូរមាត់ភ្លឺរលោង ផ្តល់ភាពសម្រាក និងជួយចិញ្ចឹមស្បែកបបូរមាត់របស់អ្នកទៀតផង។ យកត្រសក់ចិតហើយកិន ឬក្រឡុកឲ្យម៉ដ្ឋ បន្ទាប់មកយកសំឡីជ្រលក់វាលាបលើបបូរមាត់ ទុករយៈពេល២០នាទី ទៅ៣០នាទី សឹមលាងជាមួយនឹងទឹកស្អាត។អ្នកអាចអនុវត្តម្តងក្នុងមួយថ្ងៃ។
រមៀត៖ យករមៀតទៅកិនឲ្យម៉ត់ បន្ទាប់មកយកវាលាយជាមួយទឹកដោះគោឆៅ១ស្លាបព្រាកូរឲ្យខាប់បន្តិច។ យកមកលាបលើបបូរមាត់ ទុកប្រមាណ៥នាទីរួចលាងទឹកចេញ។
ប្រទាលកន្ទុយក្រពើ៖ គ្រាន់តែលាបសាច់ប្រទាលកន្ទុយក្រពើលើបបូរមាត់របស់អ្នកទុកឲ្យស្ងួត រួចលាងសម្អាត ជាមួយនឹង ទឹកក្តៅឧណ្ហៗ ដោយអនុវត្តម្តងក្នុងមួយថ្ងៃ ៕