សណ្តែកសៀងគឺជាអាហារមានសារធាតុចិញ្ចឹមចាំបាច់ដូចជា ហ្វាយប៊ឺ វីតាមីន ជាតិរ៉ែ ដែលមានអត្ថប្រយោជន៍ជាច្រើនសម្រាប់សុខភាព។ សណ្តែកសៀងភាគច្រើនត្រូវបានគេយកផលិតជាម្សៅ ជានំ ឬ ធ្វើជាទឹកសណ្តែកជាដើម។ បើអ្នកជាមនុស្សចូលចិត្តញ៉ាំអាហារធ្វើពីសណ្តែកសៀង អ្នកនឹងទទួលបានអត្ថប្រយោជន៍ដូចខាងក្រោម។
បញ្ចុះជាតិកូឡេស្តេរ៉ល់៖ ការបរិភោគសណ្តែកសៀងច្រើន អាចជួយបញ្ចុះសារធាតុកូឡេស្តេរ៉ល់មិនល្អ និងបង្កើនសារធាតុកូឡេស្តេរ៉ល់មានប្រយោជន៍។
ជួយសុខភាពបេះដូង៖ សណ្តែកសៀងអាចជួយការពារអ្នកពីបញ្ហាជំងឺបេះដូងៗផ្សេងៗបាន ដោយសារតែនៅក្នុងសណ្តែកសៀងមានផ្ទុកនូវសារធាតុ អាយសូហ្លេវន ដែលជួយក្នុងការកាត់បន្ថយកម្តៅនៅក្នុងសរសៃឈាម និងជួយសម្រួលដល់ដំណើរការនៃសរសៃឈាម។
បន្ថយសម្ពាធឈាម៖ សណ្តែកសៀងសម្បូរអាមីណូអាស៊ីត ជួយគ្រប់គ្រងសម្ពាធឈាម និងសារធាតុ អាយសូហ្លេវន ដែលជួយគ្រប់គ្រងលំនឹងរបស់សម្ពាធឈាម។
ជួយដល់ឆ្អឹង៖ ស្ត្រីនឹងឈានទៅរកបញ្ហាឆ្អឹងពុក ឬ ខ្សោយឆ្អឹង ពេលអស់រដូវព្រោះបរិមាណអរម៉ូនអ៊ឺសត្រូជេនធ្លាក់ចុះ នាំឲ្យសារធាតុកាល់ស្យូម បាត់បង់ពីក្នុងឆ្អឹង។ ដើម្បីជៀសវាងបញ្ហានេះ អ្នកគួរញ៉ាំ សណ្តែកសៀងឲ្យច្រើនដើម្បីជួយឲ្យឆ្អឹងមានសុខភាពល្អ។
កាត់បន្ថយការប្រឈមមុខនឹងជំងឺមហារីក៖ សម្រាប់ស្ត្រី ការញ៉ាំសណ្តែកសៀងអាចជួយការពារអ្នកពីការប្រឈមមុខនឹងជំងឺមហារីកស្បូនបាន ១៩ ភាគរយ និងជំងឺមហារីកពោះវៀនធំបានពី ៨ ទៅ ១២ ភាគរយ ។ វាក៏អាចបញ្ចុះហានិភ័យនៃជំងឺមហារីកក្រពេញប្រួស្តាត ចំពោះបុរសបានផងដែរ៕
