មានប្រិយមិត្តណាខ្លះដែលចូលចិត្តឆុងតែក្រហមញ៉ាំ? ជាមួយនឹងសារធាតុប្រឆាំងនឹងអុកស៊ីតកម្ម តែក្រហមមិនត្រឹមតែអាចជួយបណ្ដេញជាតិពុលប៉ុណ្ណោះទេ វាថែមទាំងអាចជួសជុលកោសិកានៃស្បែកឲ្យត្រលប់មករកភាពវ័យក្មេងម្ដងទៀត។ ដោយឡែក ក្រៅពីឆុងរួចហើយ កញ្ចប់តែក្រហមមិនគួរត្រូវបោះចោលឡើយ ព្រោះវាមានអត្ថប្រយោជន៍ដល់សម្រស់របស់អ្នកសឹងមិនគួរអោយជឿ។ ដើម្បីទទួលបានអត្ថប្រយោជន៍នៃតែក្រហម ប្រិយមិត្តអាចសាកល្បងវិធីសាស្ត្រទាំងនេះ។
កាត់បន្ថយស្នាមជ្រីវជ្រួញក្រោមភ្នែក៖ យើងអាចបិទកញ្ចប់តែក្រហមដែលឆុងរួច ដើម្បីបន្តឹងស្បែកនៅបរិវេណក្រោមភ្នែក ហើយធ្វើបែបនេះជារៀងរាល់ព្រឹក បន្ទាប់ពីភ្ញាក់ពីគេង។ វិធីនេះ អាចជួយកម្ចាត់ស្នាមជ្រីវជ្រួញបានយ៉ាងមានប្រសិទ្ធភាព។
កាត់បន្ថយត្របកភ្នែកយារធ្លាក់៖ ប្រិយមិត្តខ្លះអាចនឹងមានត្របកភ្នែកយារធ្លាក់ ក្រោយពេលភ្ញាក់ពីគេង។ យ៉ាងណាមិញ កញ្ចប់តែក្រហមដែលឆុងរួចអ្នកអាចយកវាមកបិតលើភ្នែកដើម្បី អាចជួយបន្តឹងស្បែកបរិវេណភ្នែក និងដោយសារតែវាមានផ្ទុកសារធាតុប្រឆាំងនឹងការរលាក ក៏ដូចជាបរិមាណកាហ្វេអ៊ីនតិចតួច វាក៏អាចជួយកាត់បន្ថយបញ្ហាត្របកភ្នែកយារធ្លាក់បានយ៉ាងងាយស្រួល។
កាត់បន្ថយស្លាកស្នាមនៅលើផ្ទៃមុខ៖ តែក្រហមសំបូរទៅដោយសារធាតុប្រឆាំងនឹងអុកស៊ីតកម្ម ដែលអាចជួយកម្ចាត់រ៉ាឌីកាល់សេរី និងបណ្ដេញជាតិពុល។ ដូចនេះ អ្នកក៏អាចបិទកញ្ចប់តែក្រហមដែលត្រជាក់នៅត្រង់បរិវេណដែលមានស្នាម ពីព្រោះវាអាចជួយកាត់បន្ថយស្លាកស្នាមផ្សេងៗយ៉ាងពូកែស័ក្ដិសិទ្ធិ ព្រមទាំងធ្វើឲ្យពណ៌ស្បែកស៊ីគ្នាឡើងវិញ។
ជួយឲ្យសក់ភ្លឺរលោង៖ តែក្រហមក៏មានសមត្ថភាពជួយឲ្យសក់របស់យើងមានពណ៌ខ្មៅនិងភ្លឺរលោង។ គ្រាន់តែយកទឹកតែក្រហមដែលឆុងរួច ទុកអោយត្រជាក់យកមកលាងសម្អាតសក់ បន្ទាប់ពីងូតទឹករួច នោះប្រិយមិត្តច្បាស់ជាទទួលបានសក់ស្អាត និងមានភាពទាក់ទាញជាក់ជាមិនខាន៕