ជាការពិត ការប្រើម្សៅកាហ្វេមកលាបសក់អោយក្លាយជាពណ៌ត្នោត ត្រូវបានអ្នកជំនាញចេញមកបញ្ជាក់ថា វាមានប្រសិទ្ធភាពពិតមែន។ វិធីនេះនឹងជួយអោយអ្នកទទួលបានសក់ពណ៌ត្នោតបែបធម្មជាតិ សក់មានពណ៌ស្មើគ្នា។ វាក៏តិចនិកមួយដ៏វៃឆ្លាត សម្រាប់អ្នកចង់បានសក់ពណ៌ត្នោតតាមធម្មជាតិ ហើយថែមទាំងមិនប្រឈមនឹងបញ្ហាសក់ជ្រុះ ឬខូចថែមទៀត។ ផ្ទុយទៅវិញ មានតែជួយបន្ថែមជាតិភ្លឺរលោង ដល់សសៃសក់ ដែលអ្នកគួរសាកអនុវត្តអោយបានម្តង។
អ្វីដែលអ្នកត្រូវការមានដូចជា ម្សៅកាហ្វេធម្មតា ឬ ម្សៅកាហ្វេ Espresso ចំនួន១កញ្ចប់ និង សាប៊ូបន្ទន់សក់ដែលអ្នកឧស្សាហ៍ប្រើ ២កូនចានតូច។
របៀបធ្វើ៖ យកម្សៅកាហ្វេចាក់ចូលទៅក្នុងចានមួយបន្ទាប់មកយកសាប៊ូបន្ទន់សក់ ដែលអ្នកឧស្សាហ៍ប្រើដាក់លាយចូល។ កូរគ្រឿងផ្សំទាំង២មុខនេះរហូតទាល់តែវាលាយសព្វគ្នាល្អ។
ការអនុវត្តន៍៖ កក់សក់របស់អ្នកចេញហើយជូតឲ្យស្ងួត។ បន្ទាប់មក យកកាហ្វេដែលបានលាយរួច មកលាបលើសក់របស់អ្នកដោយមានក្រាស់ជំនួយផង។ អ្នកក៏អាចប្រើម្រាមដៃដើម្បីម៉ាស្សា ឲ្យថ្នាំលាបនេះជ្រាបចូលសក់បានល្អ។ រួចយកថង់មកគ្របក្បាល និងទុកចោលរយៈពេល១ម៉ោង។ រួចមកចាំលាងជម្រះសក់ចេញជាមួយទឹកធម្មតា។ ជំហានបន្ត សូមលាបវាម្តងទៀតហើយទុកចោល១ម៉ោងដដែល ចាំលាងសក់ជាមួយទឹកធម្មតាដូចគ្នា។
ប្រសិនបើអ្នកចង់ឲ្យពណ៍៌ខាំជាប់សក់បានយូរ អ្នកត្រូវប្រើទឹកខ្មេះ។ យកទឹកខ្មេះលាយជាមួយទឹកធម្មតា បន្ទាប់មក យកវាមកលាងឲ្យសព្វសក់។ នោះពណ៍នឹងចេញមកដិត និងជាប់បានយូរថែមទៀត។ តែបើអ្នកមានអារម្មណ៍ថា ពណ៌ហាក់ដូចមិនសូវដិតទេ អ្នកក៏អាចលាបដោយប្រើកាហ្វេតាមវិធីខាងលើម្តងទៀត នៅថ្ងៃបន្ទាប់ ដើម្បីឲ្យពណ៍ចេញមកកាន់តែដិត ស្រស់ស្អាត បែបត្នោតសូកូឡា។ វិធីសាស្រ្តនេះ អ្នកអាចលាបសក់បានដោយមិនបាច់ទិញថ្នាំលាបសក់ពីខាងក្រៅ ដោយបារម្ភថាមានសារធាតុគីមីឡើយ៕