ល្ពៅជាប្រភេទបន្លែផ្លែមូលសំប៉ែតមានដើមជាវល្លិ៍ដុះលើដី។ វាគឺជាបន្លែមួយប្រភេទអាចយកទៅធ្វើម្ហូប ស៊ុប ឬ បង្អែមបាន។ ផ្លែល្ពៅសំបូរដោយសារធាតុចិញ្ចឹមដូចជាពពួកវីតាមីន និងរ៉ែផ្សេងៗមានដូចជាវីតាមីន A វីតាមីន C វីតាមីន E ប៉ូតាស្យូម ជាតិដែក ម៉ាញ៉េស្យូម និងផូស្វ័រ។ ដូចនេះបើអ្នកទទួលទានល្ពៅញឹកញាប់ធ្វើអោយអ្នកទទួលបានអត្ថប្រយោជន៍ទាំងអស់នេះ៖
ការពារជំងឺបេះដូង៖ ជាតិសរសៃ ប៉ូតាស្យូម និងវីតាមីន C ក្នុងល្ពៅសុទ្ធតែជួយទ្រទ្រង់ដល់សុខភាពបេះដូង។ ការទទួលបានប៉ូតាស្យូមគ្រប់គ្រាន់គឺសំខាន់ដូចជាការបន្ថយការញ៉ាំសូដ្យូមក្នុងការព្យាបាលសម្ពាធឈាមខ្ពស់។ សម្ពាធឈាមខ្ពស់គឺកត្តាហានិភ័យនៃជំងឺបេះដូង។ ដូចនេះ ការញ៉ាំប៉ូតាស្យូមច្រើនអាចកាត់បន្ថយហានិភ័យជំងឺបេះដូង។
ការពារជំងឺមហារីក៖ ល្ពៅជាអាហារដែលសំបូរដោយ Beta-Carotene ដែលជួយទប់ស្កាត់ការលូតលាស់នៃកោសិកាមហារីកក្រពេញប្រូស្តាត។ សារធាតុ Beta-Carotene ក៏ពន្យឺតការលូតលាស់នៃមហារីកពោះវៀនធំផងដែរ។
ការពារជំងឺទឹកនោមផ្អែម៖ ការបញ្ចូលផ្លែល្ពៅទៅក្នុងរបបអាហារអាចជួយគ្រប់គ្រងស្ថានភាពទឹកនោមផ្អែម និងកម្រិតជាតិស្ករក្នុងឈាម។ ការសិក្សាឆ្នាំ២០១៩បានបង្ហាញពីការរួមបញ្ចូលនៃសមាសធាតុរុក្ខជាតិពីរ ដែលក្នុងនោះមួយគឺសារធាតុ Polysaccharides ក្នុងផ្លែល្ពៅបានបញ្ចុះកម្រិតជាតិស្ករក្នុងឈាមនៅក្នុងសត្វកណ្តុរ។ ទោះបីជាការសិក្សានេះមិនបានសិក្សាទៅលើមនុស្ស ប៉ុន្តែក៏អាចបង្ហាញពីសក្ដានុពលក្នុងការរឹតត្បិតជំងឺទឹកនោមផ្អែមប្រភេទ២ដែរ។
ការពារបញ្ហាភ្នែកដោយកត្តាអាយុ៖ ផ្លែល្ពៅមានសារធាតុប្រឆាំងអុកស៊ីតកម្មច្រើនដូចជាវីតាមីន C E និងBeta-Carotene ដែលជួយទ្រទ្រង់សុខភាពភ្នែក និងបង្ការការខូចខាតនៅពេលចាស់ទៅ។ ការទទួលបានវីតាមីន C E និងBeta-Caroteneក្នុងកម្រិតខ្ពស់អាចកាត់បន្ថយហានិភ័យបញ្ហាភ្នែកដោយកត្តាអាយុបាន៕