ប្រិយមិត្តនារីមួយចំនួនចូលចិត្តលាបថ្នាំក្រចក និងអ្នកខ្លះទៀតចូលចិត្តលាបក្រចកទុករយៈពេលយូរមិនព្រមលាងចេញទេ។ តើការលាបថ្នាំក្រចករយៈពេលយូរសុវត្ថិភាពឬយ៉ាងណា?
ការលាបថ្នាំក្រចកអាចធ្វើឲ្យក្រចកស្ងួត៖ ការលាបថ្នាំក្រចក និងទុករយៈពេលយូរអាចធ្វើឲ្យក្រចកស្ងួត និងស្រួយ។ នៅពេលក្រចកផុយស្រួយអាចបង្កគ្រោះថ្នាក់ដល់សុខភាពដោយសារក្រចកគឺជារនាំងការពារបាក់តេរី និងផ្សិត។
ថ្នាំក្រចកពណ៌ក្រមៅៗធ្វើឲ្យក្រចកឡើងពណ៌ និងទៅជាលឿង៖ សិនជាយើងលាបថ្នាំក្រចកពណ៌ក្រមៅអាចធ្វើឲ្យជាតិពណ៌នេះជ្រាបចូលក្រចកដែលក្រចកនឹងទៅជាពណ៌លឿង។ ទោះបីជាជាតិពណ៌នេះមិនមានផលប៉ះពាល់ដល់សុខភាព ប៉ុន្តែអាចត្រូវការរយៈពេល១ឆ្នាំរហូតក្រចកត្រលប់មកសភាពដើមវិញ។ ម៉្យាងទៀតក្រចកជើងដុះយឺតជាងក្រចកដៃដែលត្រូវការរយៈពេល៩ខែក្នុងការត្រលប់មកសភាពធម្មតា រីឯក្រចកដៃត្រូវការតែ៤ ទៅ ៦ខែ។
អាចបង្កឲ្យមានផ្សិតនៅក្រចកជើង៖ ការប្រែប្រួលនៃពណ៌ក្រចកអាចមកពីថ្នាំលាបក្រចក ឬមកពីផ្សិតនៅក្រចកជើង ដើម្បីកាន់តែច្បាស់យើងអាចទៅពិគ្រោះជាមួយគ្រូពេទ្យ។ ផ្សិតនៅក្រចកជើងភាគច្រើនងាយក្នុងការព្យាបាល ប៉ុន្តែគួរប្រយ័ត្នក្នុងការចម្លងទៅអ្នកដទៃ។
តើធ្វើដូចម្តេចទើបអាចលាបថ្នាំក្រចកដោយសុវត្ថិភាព?
យើងអាចលាងថ្នាំក្រចកចេញរៀងរាល់ពីរសប្តាហ៍ និងទុកក្រចកចោលមួយថ្ងៃ ឬអាចប្តូរមកលាបពណ៌ស្រាលៗវិញដែលយើងមិនចាំបាច់ផ្លាស់ប្តូរពណ៌ថ្នាំក្រចកញឹកញាប់ទេព្រោះពណ៌ស្រាលមិនធ្វើឲ្យក្រចកឡើងពណ៌ទេ។ អ្នកឯកទេសបានណែនាំថាការលាបថ្នាំក្រចក និងទុកពីរទៅបីខែគឺមិនមានផលប៉ះពាល់អ្វីទេ ប៉ុន្តែយកល្អគួរទុកក្រចកមិនលាបអ្វីពណ៌អ្វីទាំងអស់នៅប៉ុន្មានខែបន្ទាប់។ ជាការពិត ថ្នាំក្រចកគឺមិនមានផុតកាលកំណត់ទេ ហើយការប្រើថ្នាំក្រចកដែលមានរយៈពេលយូរក៏មិនបង្កគ្រោះថ្នាក់ដែរ គ្រាន់តែថាថ្នាំស្ងួត និងលាបទៅមិនស្អាតប៉ុណ្ណោះ៕
