ស្នាមមុននិងស្បែកស្រអាប់គឺជាអ្វីដែលយើងតែងតែចំណាយពេលនិងថវិកាភ្លាមៗដើម្បីបំបាត់។ បើអ្នកកំពុងស្វែងរកវិធីដ៏មានសុវត្ថិភាពក្នុងការបញ្ឈប់បញ្ហាទាំងនេះ អ្នកអាចងាកមកសាកល្បងវិធីឆ្ពុងដោយប្រើគ្រឿងផ្សំតែបីមុខប៉ុណ្ណោះ គឺស្លឹកគ្រៃ ក្រូចឆ្មារ និងអំបិល។ វិធីឆ្ពុងនេះសូមធានាថា អ្នកនឹងទទួលបានស្បែកមុខដ៏ស្រស់ថ្លា ម៉ដ្ឋរលោង និងបំបាត់មុនបានយ៉ាងមានប្រសិទ្ធភាព។
វិធីធ្វើ៖ យកស្លឹកគ្រៃ៦គល់មកពុះពាក់កណ្ដាល ហើយយកក្រូចឆ្មារ១ផ្លែហាន់ជាចំណិតស្ដើងៗ។ យកឆ្នាំងដាំទឹក២លីត្រឱ្យពុះ រួចដាក់ស្លឹកគ្រៃ និងក្រូចឆ្មារដែលហាន់រួចចូល បង់អំបិលមួយស្លាបព្រាបាយកូរឱ្យសព្វ។ ក្រោយទឹកស្លឹកគ្រៃពុះហើយ ចូរបន្ថយភ្លើងមកតិចៗវិញរយៈពេល៥ទៅ១០នាទី ដើម្បីរម្ងាស់ឱ្យចេញប្រេងធម្មជាតិពីស្លឹកគ្រៃ និងក្រូចឆ្មារ។
វិធីប្រើ៖ អ្នកអាចយកទឹកនេះមកប្រើសម្រាប់លាងមុខជាមុនសិន ដើម្បីលាងសម្អាតជាតិពុល កោសិកាងាប់ៗដែលនៅជាប់ស្បែកមុខ និងដើម្បីបើករន្ធញើសឱ្យរីកធំ។ បន្ទាប់ពីលាងសម្អាតផ្ទៃមុខរួច យកទឹកដែលដាំខាងលើដាក់ឆ្នាំងដី ឬក្នុងឆ្នាំងក្ដៅដាក់លើតុ។ យកកន្សែងធំមកគ្របជុំវិញមុខ ដោយឱនមុខនៅរកឆ្នាំងទឹក ត្រូវចាំថាយកកន្សែងគ្របឱ្យជិត កុំឱ្យចំហាយទឹកចេញក្រៅបាន។ ពេលកំពុងទទួលចំហាយឆ្ពុង ត្រូវឱនមុខក្នុងកម្រិតសមល្មពីឆ្នាំងទឹកបានហើយ កុំដាក់ជិតឬឆ្ងាយជាងនេះ ហើយយកម្រាមដៃម៉ាស្សាថ្នមៗលើផ្ទៃមុខ ដោយរុញជារង្វង់ចុះឡើងៗ ដើម្បីឱ្យចំហាយឆ្ពុងជ្រាបចូលស្បែកមុខបានល្អ។
សូមចងចាំដែរថា ក្នុងរយៈពេលប្រើវិធីព្យាបាលមុនដោយឆ្ពុងនេះ ត្រូវកាត់បន្ថយការញ៉ាំហឹរ ជូរ និងរបស់ចៀន ហើយងាកមកញ៉ាំបន្លែ ផ្លែឈើ និងផឹកទឹក២ទៅ២លីត្រកន្លះក្នុងមួយថ្ងៃ៕
