ស្នៀតពោតជាបន្លែដែលគេពេញនិយមទទួលទានជាអាហារស្ទើរតែគ្រប់មុខទាំងឆៅ និងឆ្អិន ដោយសារតែរសជាតិផ្អែមឆ្ងាញ់ ស្រួយៗ របស់វា។ ក្រៅពីឆ្ងាញ់ ស្នៀតពោត ត្រូវបានគេដឹងថាមានប្រយោជន៍ជាច្រើនសម្រាប់សុខភាពដូចជា៖
ជួយបន្ថយសម្ពាធឈាម៖ ស្នៀតពោតសម្បូរទៅដោយជាតិប៉ូតាស្យូម ដែលវាមានសារសំខាន់ណាស់សម្រាប់អ្នកដែលមានសម្ពាធឈាមឡើងខ្ពស់។ ដូច្នេះប្រសិនជាអ្នកមានជំងឺលើសឈាម និងចង់គ្រប់គ្រងសម្ពាធឈាមឱ្យស្ថិតនៅក្នុងកម្រិតប្រក្រតី អ្នកគ្រាន់តែទទួលទានស្នៀតពោតឱ្យបានច្រើនតាមដែលអាចធ្វើបានតែប៉ុណ្ណោះ។
ជំនួយសុខភាពភ្នែក៖ វីតាមីន A ដែលមាននៅក្នុងស្នៀតពោត អាចជួយពង្រឹងដល់សុខភាពកែវភ្នែក ធ្វើឱ្យកែវភ្នែកភ្លឺថ្លាស្រឡះល្អ ការពារអាការស្រវាំងភ្នែកបានផងដែរ។ ម្យ៉ាងវិញទៀតស្នៀតពោត ថែមទាំងអាចការពារសុខភាពភ្នែកពីជំងឺភ្នែកផ្សេងៗជាច្រើន ជាពិសេសជំងឺងងឹតភ្នែកតែម្តង។
ជួយពង្រឹងប្រព័ន្ធភាពស៊ាំ៖ វីតាមីន C នៅក្នុងស្នៀតពោតអាចជួយពង្រឹងប្រព័ន្ធភាពស៊ាំការពារពីជំងឺតម្កាត់ផ្សេងៗ ថែមទាំងអាចធ្វើឱ្យរាងកាយអាចស្រូបសារធាតុវីតាមីន C បានល្អមកចិញ្ចឹមរាងកាយផងដែរ។
ជួយដល់ការទល់លាមក៖ ស្នៀតពោតសម្បូរទៅដោយជាតិកាកសសៃ ដែលអាចជំនួយដល់ប្រព័ន្ធរំលាយអាហារ សម្រួលដល់សុខភាពក្រពះពោះវៀន ធ្វើឱ្យការរំលាយអាហារដំណើរការល្អ ជាពិសេសបំលែងកាប្រូអ៊ីដ្រាតទៅជាថាមពលបានល្អ កម្ចាត់ជាតិពុលពីក្នុងខ្លួន ថែមទាំងអាចការពារ និងព្យាបាលអាការទល់លាមកបានផងដែរ។
ជួយកាត់បន្ថយជំងឺមហារីកពោះវៀនធំ៖ ជាតិកាកសសៃដ៏ច្រើននៅក្នុងស្នៀតពោត ដើរតួនាទីសំខាន់ ដែលអាចជួយកាត់បន្ថយហានិភ័យនៃជំងឺមហារីកពោះវៀនធំបានយ៉ាងប្រសើរ ជាពិសេសពន្យារពេលនៃការវិវឌ្ឍន៍នៃជំងឺមហារីកដំណាក់កាលចុងក្រោយគ្រោះថ្នាក់តែម្តង។
ជួយដល់ការសម្រកទម្ងន់៖ ស្នៀតពោតមានកាឡូរីតិចបំផុត ជាពិសេសគឺជាតិកាកសសៃហ្វៃបឺតែម្តង ដែល ថែមទាំងអាចធ្វើឱ្យអ្នកឆ្អែតបានយូរផងដែររាល់ពេលទទួលទាន។ ដូច្នេះដើម្បីសម្រកទម្ងន់ និងមិនចង់ឱ្យមាត់ចេះតែឃ្លានមិនឈប់នោះទេ អ្នកអាចយកស្នៀតពោតជារបបអាហារទទួលទានបានផងដែរ៕
