ការប្រើប្រាស់ផលិតផលគីមីដើម្បីអោយផ្ទៃមុខ ស ទន់ ម៉ដ្ឋ ភ្លឺ រលោង ស្រស់ថ្លា និងក្មេងជាងវ័យមិនប្រាកដថាបានប្រសិទ្ធភាពជារៀងរហូតនោះទេ ដូច្នេះហើយ ការងាកមកប្រើប្រាស់ផលិតផលបែបធម្មជាតិវិញទើបជារឿងល្អ ព្រោះវាមិនចំណាយថវិកាច្រើន ហើយថែមទាំងមានសម្រស់ស្រស់ស្អាតឋិតថេរបានយូរ និងមិនប៉ះពាល់ដល់សុខភាពផ្ទៃមុខទៀតផង។ ឥឡូវនេះយើងខ្ញុំនឹងបង្ហាញប្រាប់ពីរូបមន្តមុខស្អាតដោយប្រើតែចេកទុំ និងខ្ទិះដូងតែប៉ុណ្ណោះ។
អ្វីដែលអ្នកត្រូវការមាន ចេកទុំ ដែលកិនឱ្យហ្មត់ចំនួន ២ស្លាបព្រាបាយ ខ្ទិះដូង យកខ្ទិះដើម ចំនួន ៣ស្លាបព្រា។
វិធីធ្វើ៖ ជាដំបូងគ្រាន់តែយកចេកទុំម៉ដ្ឋ លាយជាមួយខ្ទិះដូងឱ្យសព្វ។ បន្ទាប់មកលុបលាងមុខឱ្យស្អាត រួចយកម៉ាស់ដែលលាយរួចលាបឱ្យសព្វលើផ្ទៃមុខទុកចោល ១៥នាទី ចាំលាងចេញនឹងទឹកស្អាតជាការស្រេច។ អ្នកអាចអនុវត្តវិធីបែបនេះឱ្យបាន ២ ទៅ ៣ដងក្នុងមួយសប្តាហ៍ដើម្បិទទួលបានប្រសិទ្ធភាពខ្ពស់។
គុណប្រយោជន៍ម៉ាស់ចេកទុំ និងខ្ទិះដូងមានដូចជា៖ ជួយធ្វើឱ្យផ្ទៃមុខ ស ទន់ ម៉ដ្ឋខៃ ស្រស់ថ្លា ភ្លឺរលោង និងមានសំណើម បំបាត់បញ្ហា ខ្មៅ ស្រអាប់ ស្នាម និងរលាកដោយសារពន្លឺថ្ងៃ កម្ចាត់ ស្បែកមុខដែលខូច និងចាស់ៗចោល ផ្តល់មកវិញនូវស្បែកមុខថ្មីពោរពេញដោយភាពទន់ស្រស់ថ្លាដូចស្បែកកូនក្មេង ធ្វើឱ្យស្បែកមុខមានសុខភាពល្អ បំបាត់ និងកាត់បន្ថយស្នាមជ្រីវជ្រួញលើផ្ទៃមុខ៕
