ជ្រាំងអណ្ដាត កើតឡើងពីផ្សិតប្រមូលផ្ដុំគ្នានៅលើភ្នាសក្នុងមាត់។ ផ្សិតប្រភេទនេះជាសរីរាង្គធម្មតាមួយនៅក្នុងមាត់ ប៉ុន្តែពេលខ្លះពួកវាបានលូតលាស់ខ្លាំង និងបង្កឲ្យមានរោគសញ្ញាជាជំងឺជ្រាំងអណ្ដាត។ ជំងឺនេះបង្កឲ្យមានដំបៅពណ៌សក្នុងមាត់ ដែលជាធម្មតាអាចមាននៅលើ អណ្ដាត ឬសាច់ថ្ពាល់ខាងក្នុង និងមានពេលខ្លះអាចរាលដាលដល់ក្រអូមមាត់ អញ្ចាញធ្មេញ បំពង់ក ឬផ្នែកខាងក្រោយនៃបំពង់ក។
ជំងឺជ្រាំងអណ្តាតអាចកើតលើមនុស្សគ្រប់វ័យ តែគេច្រើនឃើញកើតលើទារក និងមនុស្សវ័យចំណាស់ ដោយសារតែភាពស៊ាំអ្នកទាំងនោះចុះខ្សោយ និងក៏អាចកើតលើគ្នាយើងដែលមានស្ថានភាពសុខភាពមិនល្អ ឬអ្នកកំពុងប្រើថ្នាំផ្សេងៗ។ ជំងឺនេះអាចជាបញ្ហាតូចតាចប្រសិនបើយើងមានសុខភាពល្អ ប៉ុន្តែប្រសិនបើយើងមានប្រព័ន្ធភាពស៊ាំខ្សោយ រោគសញ្ញាអាចកាន់តែធ្ងន់ធ្ងរ និងពិបាកគ្រប់គ្រង។ ចំពោះទារកអាចបណ្ដាលមកពី ការបំបៅដោះ។ ទារកអាចចម្លងរោគផ្សិតទៅម៉ាក់ពេលបៅដោះ ផ្សិតនៅដោះម៉ាក់ក៏អាចឆ្លងមកមាត់ទារក។ អ្នកម៉ាក់ដែលឆ្លងមេរោគផ្សិតប្រភេទ Candida អាចមានសញ្ញា និងរោគសញ្ញាដូចជា ចុងសុដន់អាចឡើងក្រហមខុសពីធម្មតា ស្រៀវ ប្រេះ ឬរមាស់។ ស្បែករលោង ឬរោលនៅលើរង្វង់ខ្មៅជុំវិញក្បាលសុដន់។ ឈឺចាប់ខុសធម្មតាពេលបំបៅ ឬក្បាលសុដន់ឈឺនៅពេលបំបៅ។ មានអាការៈឈឺខ្ទាំនៅក្នុងសុដន់។
រោគសញ្ញាជ្រាំងអណ្តាតមានដូចជា មានជ្រាំង ឬដំបៅពណ៌សនៅលើអណ្ដាត សាច់ថ្ពាល់ខាងក្នុង និងពេលខ្លះមាននៅលើ ក្រអូមមាត់ អញ្ចាញធ្មេញ និង សាច់បំពង់ក។ ដំបៅអាចមានចេញរូបរាងដូចឈីស។ ការឡើងក្រហម ការរលាក ឬការឈឺចាប់ធ្ងន់ធ្ងរដែលបណ្ដាលឱ្យពិបាកក្នុងការញ៉ាំ។ មានហូរឈាមបើជូតចេញខ្លាំង ឬកកិតគ្នា។ ប្រេះ និងឡើងក្រហមនៅក្នុងមាត់។ បាត់បង់រសជាតិ រលាកអញ្ចាញធ្មេញ។ ក្នុងករណីធ្ងន់ធ្ងរ អាចទាក់ទងនឹង ជំងឺមហារីក ឬប្រព័ន្ធភាពស៊ាំចុះខ្សោយ ហើយដំបៅអាចរាលដាលដល់បំពង់អាហារ។ ប្រសិនបើបញ្ហានេះកើតឡើង យើងអាចពិបាកញាំ និងឈឺចាប់ ឬមានអារម្មណ៍ដូចជាអាហារជាប់នៅក្នុងបំពង់ក។
ចំពោះការព្យាបាលជំងឺជ្រាំងអណ្ដាតមាន២របៀបក្នុងនោះរួមមាន៖
វិធីព្យាបាលសាមញ្ញដែលអាណាព្យាបាលអាចធ្វើបាន ការព្យាបាលគឺអាចចាប់ផ្ដើមពីអាណាព្យាបាលផ្ទាល់ដោយ ម្ដាយត្រូវសម្អាតមាត់កូនដែលមានជំងឺតាមវិធីដូចខាងក្រោម៖ ដាំទឹកឲ្យពុះហើយទុកឲ្យនៅក្ដៅឧណ្ហៗ, បង់អំបិលស្អាតទៅក្នុងទឹកក្ដៅឧណ្ហៗនោះឲ្យប្រៃល្មម, យកក្រណាត់ទន់ៗស្អាត ដែលបានស្ងោរសម្លាប់មេរោគហើយមកជ្រលក់ទឹកអំបិលក្ដៅឧណ្ហៗនោះជូតសម្អាតក្នុងមាត់ លើអណ្ដាតឲ្យបានញឹកញាប់អាចពីបួនទៅប្រាំមួយដងក្នុងមួយថ្ងៃ ប៉ុន្ដែមិនអាចជូតខ្លាំងពេកទេព្រោះធ្វើឲ្យអណ្ដាតកុមារឈឺឬចេញ ឈាមបាន។ ផ្ទុយទៅវិញបើលោកអ្នកយកក្រណាត់មិនស្អាត ឬមិនបានសម្លាប់មេរោគជាមុនទេនោះការសម្អាតនោះនឹងក្លាយជាការ ចម្លងមេរោគ និងធ្វើឲ្យជំងឺជ្រាំងលើទារកកាន់តែធ្ងន់ធ្ងរថែមទៀត។
រីឯវិធីព្យាបាលតាមបែបវេជ្ជសាស្ដ្រ គឺជាសមត្ថកិច្ចរបស់គ្រូពេទ្យជំនាញ ក្នុងនោះការព្យាបាលមានទាំងប្រើថ្នាំជូតសម្អាតក្នុងមាត់ លើអណ្ដាត ពិសេសកន្លែងមានដំបៅជ្រាំង និងមានទាំងថ្នាំលេបតាមកម្រិតជំងឺធ្ងន់ធ្ងរ ឬក៏ស្រាល។ ការព្យាបាលនេះអាចជាសះស្បើយក្នុងអំឡុងពេលមួយសប្ដាហ៍។
ក្រៅពីការព្យាបាលយើងក៏មានវិធីបង្ការជំងឺជ្រាំងអណ្ដាតដែរគឺ ការលាងសំអាតមាត់អណ្តាតនិងធ្មេញឲ្យបានជាប្រចាំ។ ធ្វើការពិនិត្យធ្មេញជាមួយគ្រូពេទ្យធ្មេញឲ្យបានត្រឹមត្រូវ។ កាត់បន្ថយការបរិភោគអាហារផ្អែមពេក ពីព្រោះអាហារផ្អែមពេកងាយធ្វើឲ្យក្រុមមេរោគផ្សិតលូតលាស់។ ធ្វើការគ្រប់គ្រងនិងតាមដានពីជំងឺទឹកនោមផ្អែមរបស់អ្នកឲ្យបានត្រឹមត្រូវ។ ពិសារទឹកឲ្យបានគ្រប់គ្រាន់កុំឲ្យក្រអូមមាត់ស្ងួតពេក។ ការប្រើថ្នាំប្រឆាំងមេរោគផ្សិតអណ្តាត។
ករណីបំបៅកូនដោយទឹកដោះ ម្ដាយត្រូវទទួលទានអាហារឲ្យបានគ្រប់គ្រាន់ និងមានវីតាមីនច្រើនប្រភេទដើម្បីការពារ ការកើតមានជំងឺពងបែក ឬរលាក ដែលបណ្ដាលឲ្យកើតជ្រាំងអណ្ដាត។ កុមារដែលអាចញ៉ាំអាហារបានគួរឲ្យចំណីអាហារដែលមាន ជីវជាតិគ្រប់គ្រាន់ ដូចជាជាតិសាច់ ត្រី បន្លែពណ៌បៃតងចាស់ និងផ្លែឈើពណ៌លឿងទុំ និងចំណីអាហារមានជាតិវីតាមីនច្រើនប្រភេទ។ លើសពីនេះត្រូវមានអនាម័យល្អផងដែរ៕