ប្រិយមិត្តជាច្រើនប្រហែលជាដឹងហើយថា ផ្លែប៉ោម គឺជាផ្លែឈើធម្មជាតិមួយប្រភេទដែលមានគុណប្រយោជន៍ជាច្រើនដល់សុខភាព។ ដោយឡែក ការប្រើប្រាស់ផ្លែប៉ោមធ្វើជាម៉ាសបិតមុខពិតជាមានសុវត្ថិភាពចំពោះស្បែក ហើយទោះបីជាអ្នកដែលមានបញ្ហាប្រតិកម្មស្បែកក៏អាចប្រើបានដែរ។ ម៉ាសផ្លែប៉ោមគឺសម្បូរទៅដោយវីតាមីន និងសារធាតុរ៉ែចាំបាច់ជាច្រើនទៀតនោះ អាចជួយព្យាបាលបញ្ហាស្បែកស្ងួត ស្នាមអុជខ្មៅ ឬភាពចាស់មុនអាយុផងដែរ។
តើធ្វើដូចម្តេចទៅ ទើបអាចទទួលបានម៉ាសធម្មជាតិដែលពូកែបែបនេះ? ងាយស្រួលទេដោយអ្នកអាចធ្វើបានតាមវិធីខាងក្រោម៖
យកផ្លែប៉ោម១ផ្លែមកលាងទឹកឲ្យស្អាត ហើយចិតសំបកចេញ បន្ទាប់មកហាន់ផ្លែប៉ោមឲ្យល្អិតៗដាក់ចូលទៅក្នុងម៉ាស៊ីនក្រឡុកទឹកផ្លែឈើ។ បន្ថែមទឹកឃ្មុំ១ស្លាបព្រាបាយចូល រួចក្រឡុកឲ្យម៉ត់។ ចាប់ផ្តើមលាបឲ្យសព្វពេញផ្ទៃមុខ តែចៀងវាងតំបន់ភ្នែកនឹងបបូរមាត់។ទុកឲ្យល្បាយធ្វើសកម្មភាពរយ:ពេល២០នាទី ទើបលាងសម្អាតជាមួយនឹងទឹកត្រជាកធម្មតាជាការស្រេច។
សូមព្យាយាមអនុវត្តវិធីនេះជាប្រចាំ ហើយរយ:ពេល២ទៅ៣សប្តាហ៍ អ្នកនឹងសង្កេតឃើញស្បែកមុខប្រែទៅជាក្មេងជាងវ័យ ហើយស្នាមអុជខ្មៅក៏កាត់បន្ថយច្រើន។ មិនតែប៉ុណ្ណោះ ស្បែករបស់អ្នកនឹងមានសំណើម ថែមទាំងមានពណ៌ស៊ីជម្ពូរទៀតផង៕
