ការទទួលទានអាហារមានជាតិស្ករ និង ខ្លាញ់ច្រើន ធ្វើឲ្យស្បែកទៅជាមានសភាពស្ងួត។ ដើម្បីកាត់បន្ថយស្បែកខូចបែបនេះ អាហារគឺជារឿងសំខាន់ណាស់ ព្រោះវីតាមីន និងជាតិរ៉ែក្នុងអាហារ អាចជួយច្រើន។ អ៊ីចឹង បើមានស្បែកស្ងួត សូមលោកអ្នកសាកល្បងទទួលទានអាហារប៉ុន្មានមុខនេះ ព្រោះវាអាចជួយដោះស្រាយបញ្ហាលោកអ្នកបាន ៖
តែបៃតង៖ តែបៃតង មានប្រយោជន៍ល្អសម្រាប់ព្យាបាលស្បែកពីរោគសញ្ញាឆាប់ចាស់មុនអាយុ និងព្យាបាលកើតមុន។ វាផ្ទុកសារជាតិប្រឆាំងអុកស៊ីដកម្មខ្ពស់ ដូចជា តានីនអង់ស៊ីម អាស៊ីដអាមីន និងវីតាមីន B។ តែបៃតង ជួយបន្ថយល្បឿនវិវត្តទៅរកភាពចាស់ និងស្នាមជ្រួញ។
ត្រី៖ ត្រីមួយចំនួនដូចជា ត្រីសាលម៉ុន ជាប្រភពសម្បូរអាស៊ីដខ្លាញ់អូមេហ្គា៣ និងមានប្រយោជន៍ ដែលគេស្គាល់ថាអាចបង្ការជំងឺបេះដូង។ ជាតិខ្លាញ់នៅក្នុងត្រីទាំងនេះ ជាប្រភពបង្កើនគុណភាពស្បែកឲ្យកាន់តែស្អាត មិនមានស្នាមជ្រីវជ្រួញ។ អ្នកត្រូវដឹងថា ស្បែកស្ងួតបណ្ដាលឲ្យមើលទៅជ្រួញឆាប់ចាស់។
ខ្ទឹមបារាំង និងខ្ទឹមស៖ សម្បូរសារធាតុស្ពាន់ធ័រ ដែលប្រឆាំងអុកស៊ីដកម្ម។ បន្លែទាំងពីរនេះផ្ទុកសារធាតុប្រឆាំងបាក់តេរី និងរោគផ្សិតដែលជួយកាត់បន្ថយការកកស្ទះរន្ធញើស និងព្យាបាលមុន។ ស្នាមមុនលើស្បែកអាចជម្រះចេញដោយតែបៃតងផងដែរ។
ផ្លែប៊ើរី និង គីវី៖ ផ្លែឈើទាំងនេះមានវីតាមីន C ជួយប្រឆាំងភាពឆាប់ចាស់ និងវីតាមីន E ប្រឆាំងអុកស៊ីដកម្មដែលបំផ្លាញស្បែក។ ផ្លែគីវី អាចជួយការពារស្បែកប្រឆាំងកាំរស្មី UV។ ញ៉ាំទឹកផ្លែឈើស្រស់ដែលសម្បូរវីតាមីនទាំងពីរនេះ តែម្ដង ក៏ល្អដែរ។
បន្លែ ផ្លែឈើពណ៌ទឹកក្រូច៖ បន្លែផ្លែឈើពណ៌ទឹកក្រូចក្នុងអាហារ ផ្ដល់សមាសធាតុមួយហៅថា បេតាការ៉ូទីន ទៅជាវីតាមីន A ក្នុងរាងកាយ។ បេតាការ៉ូទីន និងវីតាមីន A ជួយរក្សាសំណើម ជួយពន្យារភាពចាស់ជ្រីវជ្រួញ។
ទោះយ៉ាងណា បើសិនជាអ្នកមានបញ្ហាស្បែកស្ងួតខ្លាំង ហើយទទួលទានអាហារទាំងនេះមិនបានផល សូមទៅពិគ្រោះជាមួយគ្រូពេទ្យជំនាញដើម្បីស្វែងរកដំណោះសា្រយ អោយបានទាន់ពេលវេលា៕