ក្បាលពោះហៀរសុទ្ធតែខ្លាញ់ គឺជារឿងដែលប្រិយមិត្តមិនចង់បានឡើយ។ បើលេបថ្នាំសម្រកខ្លាចប៉ះពាល់សុខភាពទៅថ្ងៃមុខ។ បើលោកអ្នកព្រួយបារម្ភដូចនេះ អញ្ចឹងមានតែវិធីធម្មជាតិៗដូចជាការថែទាំ ហាត់ប្រាណ របបអាហារប៉ុណ្ណោះ ទើបគ្មានអ្វីត្រូវបារម្ភ។ ក្នុងនោះដែរ សូម្បីទឹកផ្លែឈើ ក៏ដើរតួនាទីសំខាន់ក្នុងការជួយឲ្យក្បាលពោះរាបស្មើ ស្រស់ស្អាតដូចប្រាថ្នា។
ទឹកឪឡឹក៖ ផ្លែឪឡឹកមិនត្រឹមតែមានរសជាតិឆ្ងាញ់ប៉ុណ្ណោះទេ អ្នកក៏អាចកិនយកទឹករបស់វា ផឹកស្រស់ៗ ដើម្បីកាត់បន្ថយកាឡូរី បញ្ចុះកម្តៅក្នុងរាងកាយ ធ្វើឲ្យក្បាលពោះរាបស្មើ។
ទឹកម្នាស់៖ ក្នុងផ្លែម្នាស់សម្បូរទៅដោយជីវជាតិសំខាន់ៗជាច្រើន ពិសេសផលប្រយោជន៍ចំពោះសម្រស់។ ម្នាស់មានប្រូតេអ៊ីនម្យ៉ាង ដែលចូលទៅសម្រួលដល់ប្រព័ន្ធរំលាយអាហារ និងកាត់បន្ថយជាតិខ្លាញ់បានយ៉ាងល្អ។ អ្នកអាចត្រងយកតែទឹក ឬកិនលាយជាមួយសាច់ម្នាស់ ហើយផឹកបញ្ចូលគ្នាតែម្តងក៏បាន។
ទឹកបឺរ៖ ក្នុងផ្លែបឺរគ្មានជាតិស្ករធ្វើធាត់ដូចផ្លែឈើដទៃទៀតទេ។ វាមានប្រយោជន៍ច្រើនរាប់មិនអស់ចំពោះរាងកាយ និងអាចជួយកាត់ជាតិខ្លាញ់អាក្រក់នៅក្នុងខ្លួនរបស់អ្នក ពិសេសត្រង់ផ្នែកក្បាលពោះ។ គួរកិនបឺរស្រស់ ដោយពុំចាំបាច់ដាក់បន្ថែមស្ករឬទឹកដោះគោស្រស់ទេ បើអ្នកមិនចង់ឡើងគីឡូលើសដើម។
សរុបមក របៀបរស់នៅប្រកបដោយសុខភាពល្អចាប់ផ្តើមពីជំហានតូចមួយ និងថែរក្សាសុខភាពរបស់អ្នកដោយធ្វើរឿងសាមញ្ញៗ នោះអ្នកនឹងអាចរស់នៅក្នុងជីវិតដែលមានសុភមង្គល និងសុខភាពល្អ។ យើងដឹងថាមានទឹកផ្លែឈើច្រើនទៀតដែលអ្នកអាចទទួលបានចំណែកឯទឹកផ្លែឈើដែលបានរៀបរាប់ខាងលើគ្រាន់តែជាទឹកផ្លែឈើធម្មតាដែលអ្នកអាចរកបានយ៉ាងងាយ៕