ក្រូចថ្លុងក្រៅពីមានរសជាតិផ្អែមឆ្ងាញ់ហើយ ផ្លែឈើប្រភេទនេះក៏សម្បូរទៅដោយវីតាមីន ជាតិរ៉ែ និង សារធាតុប្រឆាំងអ៊ុកស៊ីតកម្មដែលល្អចំពោះសុខភាពទៀតផង។ ពេលនេះយើងខ្ញុំនឹងបង្ហាញពីអត្ថប្រយោជន៍នៃក្រូចថ្លុងដែលគ្នាយើងគ្រប់គ្នាមិនគួរមើលរំលង។
មានជាតិសរសៃ៖ ក្នុងមួយថ្ងៃ យើងត្រូវការជាតិសរសៃយ៉ាងតិចណាស់ ២៥ក្រាម។ ផ្លែក្រូចថ្លុងមួយផ្លែ មានជាតិសរសៃ៦ក្រាម ដូចនេះការញ៉ាំក្រូចថ្លុងជាជម្រើសមួយដ៏ល្អសម្រាប់បំពេញជាតិសរសៃសម្រាប់រាងកាយ។ ជាតិសរសៃនេះជួយដល់ការបន្ទោរបង់និងបង្ការការទល់លាមក។ មិនត្រឹមតែប៉ុណ្ណោះ ជាតិសរសៃអាចជួយដល់ឆ្អឹង ការរក្សាទម្ងន់រយៈពេលវែង ជំនួយដល់សុខភាពពោះវៀន និងខួរក្បាល រួមទាំងបន្ថយការប្រឈមនឹងការកើតជំងឺរ៉ាំរ៉ៃមួយចំនួន។
ជួយបញ្ចុះទម្ងន់៖ ក្រូចថ្លុងជាអាហារមានកាឡូរីទាប ដែលអាចជួយដល់ការបញ្ចុះទម្ងន់។ ម៉្យាងទៀតក្រូចថ្លុងក៏មានប្រូតេអ៊ីន ដែលអាចជួយឲ្យយើងឆ្អែតបានយូរ។ ដូចនេះ ផ្លែក្រូចថ្លុងជាជម្រើសដ៏ល្អប្រសិនជាយើងចង់កាត់បន្ថយចំនួនកាឡូរីក្នុងរាងកាយ និងសម្រកទម្ងន់។
ប្រឆាំងអ៊ុកស៊ីតកម្ម៖ ផ្លែក្រូចថ្លុងសម្បូរទៅដោយសារធាតុប្រឆាំងអ៊ុកស៊ីតកម្ម ដែលអាចជួយក្នុងការបង្ការ និងបម្រុងទុកនូវកោសិកាដែលខូចខាតដោយសារពពួករ៉ាឌីកាល់សេរី។ ពពួករ៉ាឌីកាល់សេរីគឺជាសមាសធាតុដែលមាននៅក្នុងបរិយាកាស និងអាហារដែលអាចបង្កឲ្យមានបញ្ហាសុខភាព និងជំងឺរ៉ាំរ៉ៃ។ ដោយសារក្រូចថ្លុងមានផ្ទុកនូវវីតាមីន C ច្រើន លទ្ធភាពក្នុងការបញ្ចេញសារធាតុប្រឆាំងអ៊ុកស៊ីតកម្មក៏ល្អដែរ។
ជួយសុខភាពបេះដូង៖ ផ្លែក្រូចថ្លុងអាចជួយកាត់បន្ថយនូវកូលេស្តេរ៉ូល និងខ្លាញ់អាក្រក់ ដែលបង្កជំងឺបេះដូង។ ប្រសិនជាអ្នកកំពុងប្រើប្រាស់ថ្នាំបញ្ចុះកូលេស្តេរ៉ូល គួរចៀសវាងបរិភោគក្រូចថ្លុង។
ជួយពន្យាភាពចាស់៖ ផ្លែក្រូចថ្លុងសម្បូរវីតាមីន C ដែលអាចជួយបង្ការការខូចខាតរបស់ស្បែក និងជួយរក្សាសម្រស់។ បន្ថែមពីនេះទៀត ក្រូចថ្លុងក៏ជួយកាត់បន្ថយ កម្រិតជាតិស្ករក្នុងឈាមបានដែរ។
ប្រឆាំងបាក់តេរី៖ ផ្លែក្រូចថ្លុងក៏មានផ្ទុកសារធាតុប្រឆាំងនឹងបាក់តេរី និងផ្សិតដែរ។
បង្ការជំងឺមហារីក៖ ផ្លែក្រូចថ្លុងក៏អាចជួយកំចាត់កោសិកាមហារីក និងទប់ស្កាត់ការរីករាលដាលនៃមហារីកដែរ។ សារធាតុប្រឆាំងអ៊ុកស៊ីតកម្មអាចកំចាត់នូវកោសិកាមហារីក និងជួយដល់ប្រព័ន្ធភាពស៊ាំ។ វាក៏អាចកំចាត់នូវកោសិកាមហារីកក្រពេញប្រូស្តាត និងលំពែងរួមទាំងទប់ស្កាត់ការរីករាលដាលនៃមហារីកសួតទៀត៕
