ការក្អក ស្លេស ជាបញ្ហាគួរឱ្យរំខានមួយ និងមិនងាយបាត់ទៅវិញដោយឯកឯងឡើយ។ ក្រៅពីថ្នាំពេទ្យក៏នៅមានរូបមន្តឱសថបែបធម្មជាតិមួយដែលអាចជួយព្យាបាលអាការក្អក និងបំបាត់អាការរមាស់ក្នុងបំពង់បានយ៉ាងប្រសើរ។ អ្នកនឹងធ្វើការចំណាយតិចបំផុត ដើម្បីធ្វើថ្នាំបំបាត់ក្អក ស្លេស រួមទាំងអាចបំបាត់បញ្ហា ពងបែកក្នុងមាត់ រលាកបំពង់ ក យ៉ាងពូកែថែមទៀត។
គ្រឿងផ្សំដែលអ្នកត្រូវការមានតែ ក្រូចសើច ៥ផ្លែ និង ស្ករសពណ៌ត្នោត ៣ស្លាបព្រាបាយប៉ុណ្ណោះ។
សម្រាប់របៀបធ្វើគឺ ដំបូងអ្នកត្រូវយកផ្លែក្រូចសើចទៅលាងទឹកឲ្យបានស្អាតល្អ រួចចិតជាដុំតូចៗនិងយកគ្រាប់វាចេញ។ ជាបន្តសូមយកវាដាក់ចូលក្នុងក្រឡកែវមួយ បន្ទាប់មកចាក់ស្ករចូលតាមក្រោយ។ បិទគម្របឲ្យបានជិតល្អរួចទុកវារយៈពេល៣០ថ្ងៃ។ បន្ទាប់ពីទុករយៈពេល៣០ថ្ងៃមកអ្នកនឹងឃើញមានទឹកថ្នាំ។ សូមយកវាទៅរក្សាទុកក្នុងទូរកកទើបអាចប្រើបានយូរ។
ចំពោះរបៀបប្រើវិញគឺ អ្នកត្រូវញាំ១ស្លាបព្រាបាយនៅពេលព្រឹកព្រលឹម និង១ស្លាបព្រានៅពេលយប់មុនចូលគេង។ ឱសថបុរាណនេះនឹង ជួយបំបាត់អាការៈក្អកស្ងួត និងក្អកមានស្លេស រួមទាំងអាការៈ តឹងច្រមុះពិបាកដកដង្ហើម រលាកបំពង់ក ឈឺបំពង់ក និងពងបែកក្នុងមាត់ផងដែរ៕
