ជាធម្មតាមុនលើផ្ទៃមុខកើតមានដោយសារតែការប្រែប្រួលអរម៉ូន ដែលធ្វើអោយមានការផលិតជាតិខ្លាញ់ច្រើនជាងធម្មតា នាំអោយរន្ធញើសកកស្ទះ បង្កអោយកើតមុន។ ស្លាកស្នាមដែលបន្សល់ដោយការកើតមុនភាពច្រើនពណ៏ក្រហម ឬ ត្នោត។ យ៉ាងណា អ្នកអាចត្រឡប់មកមានស្អាតដូចដើមវិញបាន ដោយគ្រឿងផ្សំប៉ុន្មានមុខនេះ។
ទី១ ប្រទាលកន្ទុយក្រពើ៖ ប្រទាលកន្ទុយក្រពើមានផ្ទុកសារធាតុប្រឆាំងនឹងការរលាក។ វាអាចប្រើប្រាស់ជាគ្រឿងផ្សំដ៏សក្តិសិទ្ធីក្នុងការកម្ចាត់ស្នាមមុន។ អ្នកអាចយកប្រទាលកន្ទុយក្រពើមួយធាង កោសយកសាច់វាមកលាបសាច់លើស្នាម ហើយម៉ាស្សាថ្នម។ ទុកចោលប្រហែល ៣០ នាទី រួចលាងជម្រះនឹងទឹកស្អាត។ អនុវត្ត ២ ទៅ ៣ ដងក្នុងមួយថ្ងៃ
ទី២ ក្រូចឆ្មា៖ ក្រូចឆ្មាអាចជួយធ្វើអោយស្លាកស្នាមគ្រប់ប្រភេទរលុបបានយ៉ាងងាយ។ វាអាចជួយកម្ចាត់កោសិកាងាប់ ជម្រុញការលូតលាស់នៃកោសិកាថ្មី ព្រមទាំងជួយអោយស្បែកមានសភាពរស់រវើកឡើងវិញ។ អ្នកអាចយកទឹកក្រូចឆ្មា លាយជាមួយទឹកឃ្មុំមកលាបលើបរិវេណដែលស្នាមដោយដៃ ឬ សំឡី។ ទុកចោលប្រហែល ១០ នាទី រួចលាងជម្រះនឹងទឹកស្អាត។ អនុវត្ត ១ ទៅ ២ ដងក្នុងមួយថ្ងៃ។
ទី៣ ប្រេងដូង៖ ប្រេងដូងសម្បូរទៅដោយវីតាមីន E និង អាស៊ីតខ្លាញ់។ អ្នកត្រូវយកប្រេងដូងលាបលើបរិវេណដែលស្នាម ឬ យកប្រេងដូងក្ដៅឧណ្ឌៗ មកម៉ាស្សាប្រហែល ៥ ទៅ ១០ នាទី ហើយទុកចោលប្រហែល១ម៉ោង ចាំលាងជម្រះនឹងទឹកក្ដៅឧណ្ឌៗ។ សូមអនុវត្ត ១ ទៅ ២ ដងក្នុងមួយថ្ងៃ។
ទី៤ រមៀត៖ សមាសធាតុដែលមាននៅក្នុង រមៀត ជួយស្បែកអោយជាសះស្បើយកាន់តែឆាប់រហ័ស។ សូមលាយម្ស៉ៅរមៀត ១ ស្លាបព្រាបាយលាយជាមួយទឹកក្រូចឆ្មាកន្លះផ្លែ។ លាបលើផ្ឌៃមុខដែលមានបញ្ហា ហើយទុកចោលប្រហែល ១៥ នាទី ចាំលាងជម្រះនឹងទឹកក្ដៅឧណ្ឌៗ ជូតមុខអោយស្ងួត រួចលាបឡេផ្ដល់សំណើម។ អនុវត្ត ១ ទៅ ២ ដងក្នុងមួយថ្ងៃ៕