ពងក្រួចមិនត្រឹមតែមានអត្ថប្រយោជន៍អស្ចារ្យសម្រាប់សុខភាពទូទៅប៉ុណ្ណោះទេ វាថែមទាំងជួយឲ្យមនុស្សមានអាយុវែងផងដែរ។ ការទទួលទានពងក្រួចអាចជួយបង្កើនកម្លាំងឈាម សម្អាតស្បែក បង្ការភាពស្លេកស្លាំង និងជំនួយដល់ស្ត្រីមានផ្ទៃពោះ។ ជាធម្មតាពងក្រួចមួយគ្រាប់ទម្ងន់ប្រហែលជា ១០ក្រាម ប៉ុន្តែវាមានតម្លៃអាហាររូបត្ថម្ភខ្ពស់ជាស៊ុតផ្សេងៗទៀត ៣ដង។ លើសពីនេះទៅទៀត ការទទួលទានពងក្រួចជាប្រចាំ អ្នកនឹងទទួលបានអត្ថប្រយោជន៍ទាំងនេះ។
ជួយបង្កើនការចង់ចាំ៖ សមាសភាពម៉ូលេគុលនៃសារធាតុចិញ្ចឹមនៅក្នុងពងក្រួច អាចឲ្យរាងកាយស្រូបយក និងរំលាយងាយស្រួលជាងស៊ុតមាន់។ ពងក្រួចត្រូវបានគេទទួលស្គាល់ថា ជាថ្នាំជំនួយខួរក្បាលដោយសារតែវាមានផ្ទុកវីតាមីន D កម្រិតខ្ពស់ជាងស៊ុតផ្សេងៗទៀត។
មានកូឡេស្តេរ៉ុលទាប៖ កូឡេស្តេរ៉ុល និងជាតិខ្លាញ់ផ្សេងៗ ដែលមាននៅក្នុងពងក្រួច អាចរលាយទៅជាសារធាតុរាវ ហើយជ្រាបចូលទៅក្នុងសរសៃឈាម នឹងផ្តល់សារធាតុចិញ្ចឹមទៅឲ្យរាងកាយដោយផ្ទាល់។ ដូច្នេះការទទួលទានពងក្រួចផ្នែកពណ៌ក្រហម មិនបណ្តោលឲ្យកម្រិតកូឡេស្តេរ៉ុលក្នុងឈាមកើនឡើងនោះទេ។
ល្អសម្រាប់ខួរក្បាល៖ នៅក្នុងពងក្រួចមានផ្ទុកសារធាតុ Lencithin និង Cephalin ខ្ពស់ជាងស៊ុតមាន់រហូតដល់ ៣ ទៅ៤ដង។ សារធាតុចិញ្ចឹមទាំងពីរនេះហើយ ដែលសំខាន់សម្រាប់សកម្មភាពខួរក្បាល។ នេះជាមូលហេតុដែលគេចាត់ទុកពងក្រួច ជាអាហារដ៏មានតម្លៃសម្រាប់សិស្សនិស្សិត និងបុគ្គលដែលត្រូវប្រើខួរក្បាលគិតច្រើន។
ការពារភ្នែក៖ ពងក្រួចមានផ្ទុកវីតាមីន B2 ច្រើនជាងស៊ុតមាន់រហូតដល់ទៅ ២,៥ដង។ ដូច្នេះ ពងក្រួច ត្រូវបានគេចាត់ទុកថា មានប្រសិទ្ធភាពការពារបញ្ហាភ្នែក និងជួយឲ្យភ្នែកភ្លឺច្បាស់។
ល្អប្រសើរសម្រាប់សុខភាពមនុស្សស្រី៖ ពងក្រួចមានប្រសិទ្ធិភាពខ្លាំងបំផុតក្នុងការគ្រប់គ្រងការមករដូវ និងធ្វើឲ្យស្បែកស្អាត។ លើសពីនេះទៅទៀត ពងក្រួច ជាអាហារដែលអាចជួយការពារកង្វះឈាម មុន និងក្រោយពេលសម្រាលកូន។ បើទោះបីជា ពងក្រួច តូចក៏ពិតមែន ប៉ុន្តែវាជាអាហាររូបត្ថម្ភដ៏ល្អប្រសើរ ដែលអ្នកជំនាញបានផ្តល់អនុសាសន៍ ឲ្យអ្នករាល់គ្នាទទួលទានឲ្យបានញឹកញាប់៕