កង្វះសារធាតុចិញ្ចឹមអាចប៉ះពាល់ដល់សុខភាពសក់ ជាពិសេសគឺជួបបញ្ហាជ្រុះសក់តែម្តង។ ថ្ងៃនេះយើងសូមលើកឡើងនូវអាហារដ៏ល្អបំផុតមួយចំនួនដែលមានតម្លៃអាហារូបត្ថម្ភខ្ពស់សម្រាប់ជួយដល់ការលូតលាស់សក់របស់លោកអ្នក ជាពិសេសជួយជួយព្យាបាលសក់ជ្រុះ។
ស៊ុតគឺជាប្រភពដ៏អស្ចារ្យនៃប្រូតេអ៊ីន និងសារធាតុ Biotin ដែលមានសារៈសំខាន់សម្រាប់សុខភាពសក់ និងការលូតលាស់សក់។ កង្វះសារធាតុចិញ្ចឹមទាំងពីរនេះមានទំនាក់ទំនងទៅនឹងការជ្រុះសក់។
ផ្លែប៊ឺរីផ្ទុកទៅដោយសារធាតុប្រឆាំងអុកស៊ីតកម្ម និងវីតាមីន ដែលអាចជួយដល់ការលូតលាស់សក់។ ផ្លែស្ត្របឺរីសម្បូរទៅដោយវីតាមីន C ដែលជួយដល់ការផលិតកូឡាជែន និងការស្រូបយកជាតិដែក ដែលជាកត្តាអាចជំរុញការលូតលាស់សក់។
ស្ពៃខ្មៅផ្ទុកទៅដោយសារធាតុ Folate, ជាតិដែក និងវីតាមីន A និង C ដែលមានសារៈសំខាន់សម្រាប់ការលូតលាស់សក់។ កង្វះខាតនៅក្នុងសារធាតុចិញ្ចឹមទាំងនេះអាចបណ្តាលឱ្យជ្រុះសក់។
ត្រីខ្លាញ់ដូចជាត្រី Salmon, Herring, និង Mackerel គឺជាប្រភពដ៏អស្ចារ្យនៃអាស៊ីតខ្លាញ់អូមេហ្គា ៣ ដែលអាចជួយដល់ការលូតលាស់សក់។ បន្ថែមពីនេះ ត្រីខ្លាញ់ក៏ជាប្រភពអាហារមួយនៃអាហារដែលមានវីតាមីន D ដែលអាចមានសារៈសំខាន់សម្រាប់ការលូតលាស់សក់។
ដំឡូងជ្វាផ្ទុកទៅដោយវីតាមីន A ដែលមានសារៈសំខាន់សម្រាប់ការលូតលាស់សក់ និងក្នុងការផលិតសារធាតុខ្លាញ់ដែលអាចជំរុញការលូតលាស់សក់ (Sebum ជាសារធាតុខ្លាញ់ដែលផលិតនៅក្នុងក្រពេញ Sebaceous )។
ផ្លែបឺរសម្បូរទៅដោយវីតាមីន E ដែលជាសារធាតុប្រឆាំងអុកស៊ីតកម្មជួយការពារភាពតានតឹងអុកស៊ីតកម្មដែលអាចនាំឱ្យជ្រុះសក់។
គ្រាប់ធញ្ញជាតិ សម្បូរទៅដោយសារធាតុចិញ្ចឹមដូចជា វីតាមីន E វីតាមីន B ស័ង្កសី និងអាស៊ីតខ្លាញ់សំខាន់ៗទាំងអស់ដែលមានសារៈសំខាន់សម្រាប់ការលូតលាស់សក់ និងត្រូវបានផ្សារភ្ជាប់ជាមួយនឹងអត្ថប្រយោជន៍សុខភាពជាច្រើនទៀត។ ឧទាហរណ៍គ្រាប់ធញ្ញជាតិ ដូចជា អាល់ម៉ុន ជាដើម។
ម្ទេសប្លោកគឺជាប្រភពដ៏សម្បូរបែបនៃវីតាមីន A និង C ដែលជាសារធាតុចិញ្ចឹមជួយឱ្យសក់មានសុខភាពល្អ និងអាចជួយឱ្យសក់លូតលាស់បាន។
អយស្ទ័រគឺជាប្រភពដ៏ល្អបំផុតមួយនៃស័ង្កសីនៅក្នុងរបបអាហារ។ សារធាតុរ៉ែនេះជួយគាំទ្រដល់ការលូតលាស់សក់ និងវដ្តនៃការដុះសក់។
សណ្តែកគឺជាប្រភពដ៏អស្ចារ្យនៃប្រូតេអ៊ីន ជាតិដែក ស័ង្កសី និងប៊ីយ៉ូទីន ដែលសុទ្ធសឹងតែមានសារៈសំខាន់សម្រាប់សុខភាពសក់។
សណ្តែកសៀងគឺជាប្រភពដ៏ល្អបំផុតមួយនៃសមាសធាតុ Spermidine ដែលអាចធ្វើឱ្យដំណាក់កាលសកម្មនៃការលូតលាស់សក់កាន់តែមានរយៈពេលយូរ។
សាច់គឺជាប្រភពប្រូតេអ៊ីនដ៏អស្ចារ្យដែលមានសារៈសំខាន់សម្រាប់សុខភាពសក់។ ជាពិសេស សាច់ក្រហមសម្បូរទៅដោយជាតិដែក អាចជំនួយដល់ការលូតលាស់សក់។
ជារួម អ្វីដែលអ្នកញ៉ាំអាចប៉ះពាល់ដល់សុខភាពសក់របស់អ្នក។ កង្វះសារធាតុចិញ្ចឹមត្រឹមត្រូវ រួមមាន វីតាមីន A, C, D, និង E, ស័ង្កសី, វីតាមីន B, ជាតិដែក, ប៊ីយ៉ូទីន, ប្រូតេអ៊ីន និងអាស៊ីតខ្លាញ់សំខាន់ៗ អាចពន្យឺតការលូតលាស់សក់ ឬអាចបណ្តាលឱ្យជ្រុះសក់។ ការកែតម្រូវកង្វះសារធាតុចិញ្ចឹមទាំងនេះអាចជួយព្យាបាលសក់ជ្រុះ និងលើកកម្ពស់អត្រាកំណើនសក់ឡើងវិញ។ ប្រសិនបើអ្នកកំពុងខ្វះសារធាតុចិញ្ចឹមទាំងនេះ សូមព្យាយាមបន្ថែមអាហារខាងលើទៅក្នុងរបបអាហាររបស់អ្នក៕