អ្នកអាចប្រើប្រាស់រមៀត មកជាគ្រឿងផ្សំសម្រាប់ព្យាបាលមុខមុនយ៉ាងមានប្រសិទ្ធភាព។ សម្រាប់អ្នកមានបញ្ហាមុខមុន ជាពិសេស ប្រសិនចង់ព្យាបាលមុខមុន ដោយប្រើប្រាស់រមៀត អ្នកអាចច្នៃវាមកផ្សំជាមួយរបស់ទាំង ៣ ខាងក្រោមនេះបាន។
រមៀតនិងក្រូចឆ្មា៖ ក្រូចឆ្មាមានវីតាមីន C ជួយជម្រុះកោសិកាងាប់ ធ្វើឲ្យស្បែកស។ រមៀតផ្សំជាមួយទឹកក្រូចឆ្មា បង្កើតជាល្បាយ ដែលប្រៀបដូចជាឱសថមួយអ៊ីចឹងដែរ។ វាអាចព្យាបាលស្នាមក្រហម ដែលបណ្តាលមកពីមុន យ៉ាងមានប្រសិទ្ធភាព។ សូមបុកឬសរមៀត ១ ដើម យកទឹកដាក់ចូលកែវមួយ ហើយច្របាច់ទឹកក្រូចឆ្មាកន្លះផ្លែ រួចកូរឲ្យសព្វជាមួយទឹករមៀត។ យកសំឡីមកជ្រលក់ទឹកនោះ ហើយជូតថ្នមៗលើកន្លែងរលាក ឬស្នាមមុន បន្តធ្វើរយៈ ពេល ២-៣ ថ្ងៃ អ្នកនឹងឃើញប្រសិទ្ធភាព។
រមៀតនិងទឹកអង្ករ៖ ទឹកដែលយើងយកអង្ករមួយក្តាប់មកត្រាំ វាសម្បូរទៅដោយវីតាមីន B, B1 និង E ហើយមានប្រសិទ្ធភាពជួយឲ្យស្បែកស បំបាត់ស្នាមអុជខ្មៅ កាត់បន្ថយមុន។ សូមយកទឹកអង្ករ ១ ចានគោម លាយជាមួយម្សៅរមៀត ២ ស្លាបព្រាបាយ ហើយកូរឲ្យសព្វ។ យកល្បាយនោះមកលាបលើផ្ទៃមុខ ក និងកន្លែងដែលមានបញ្ហាមុន ទុកចោល ១៥ នាទី សឹមលាងទឹកចេញ។
រមៀតនិងទឹកដោះគោជូរ៖ ទឹកដោះគោជូរ ឬយ៉ាអួរគ្មានជាតិស្ករ គឺល្អសម្រាប់ស្បែក ហើយវាមានផ្ទុកអាស៊ីដ Probiotic រួមជាមួយនឹងសារធាតុរ៉ែ ដែលផ្តល់សំណើមដល់ស្បែក គួបផ្សំជាមួយរមៀតផង ដូច្នេះអាចកាត់បន្ថយមុន បំបាត់មុនក្បាលខ្មៅយ៉ាងមានប្រសិទ្ធភាព។ សូមលាយម្សៅរមៀត ២ ស្លាបព្រាបាយ និងទឹកដោះគោជូរគ្មានជាតិស្ករ ៤ ស្លាបព្រាបាយ រួចកូរឲ្យសព្វ។ បន្ទាប់ពីលាងមុខរួច ចូរយកល្បាយនោះមកលាបលើមុខ ហើយម៉ាស្សាថ្នមៗ ជាពិសេសលើកន្លែងកើតមុន រួចទុកចោល ១៥ នាទី សឹមលាងជម្រះជាមួយទឹកក្ដៅឧណ្ហៗ៕