អង្គែជាបញ្ហាមួយដែលទាមទារអោយអ្នកត្រូវយកចិត្ដទុកដាក់ ព្រោះវាមិនត្រឹមតែរំខានដល់សកម្មភាពការងារប្រចាំថ្ងៃនោះទេតែវាក៏ធ្វើឱ្យរមាស់ និងអាចធ្វើឱ្យក្បាលរបស់យើងទំពែកបានដែរ។
មានអ្នកខ្លះតែងតែព្យាយាមជ្រើសរើសយកសាប៊ូដែលមាន គុណភាពល្អមកកក់សម្អាតស្បែកក្បាល តែអ្នកខ្លះទៀត ទោះបីជាខិតខំជ្រើសរើស និងប្ដូរផលិតផលសាប៊ូជាច្រើនយ៉ាងណា ក៏នៅតែមិនបាត់។
អង្គែអាចកើតពីមូលហេតុមួយចំនួនដូចការស្រ្តេសជាប្រចាំ ឬធូលីហុយចំក្បាលជាដើម។
នៅពេលនេះយើងខ្ញុំសូមលើកយកនូវវីធីខ្លះៗ ដើម្បីជួយបំបាត់អង្គែបាន ដែលវិធីទាំងនោះមានដូចជា៖
អំបិល និងសាប៊ូ៖ អនុវត្តវិធីនេះចំណាយអស់តិច និងងាយស្រួលបំផុត ដោយគ្រាន់តែរោយអំបិលចូលក្នុងសាប៊ូកក់សក់ រួចយកទៅកក់ត្រដុសលើស្បែកក្បាល បន្ទាប់មកលាងសម្អាតជាមួយទឹកជាការស្រេច។
លោកអ្នកក៏អាច គ្រាន់តែវែកសក់ជាពីរ រួចរោយអំបិល ១ ទៅ ២ ស្លាបព្រាកាហ្វេ លើស្បែកក្បាលរួចម៉ាស្សាដោយប្រើដៃសើម រយៈពេល ១០ នាទី និងកក់សក់សម្អាតចេញ។ អំបិលអាចជួយរំញោចចលនាឈាមរត់ ធ្វើឲ្យសុខភាពស្បែកក្បាលល្អឡើងវិញ និងជួយបំបាត់កំណកអង្គែបានយ៉ាងរហ័ស ជាពិសេស អាចជួយការពារផ្សិតលើស្បែកក្បាលបានទៀតផង។
ទឹកក្រូចឆ្មារ និងអំបិល៖ វិធីសាមញ្ញមួយទៀត គឺទឹកក្រូចឆ្មារ និងអំបិលជារូបមន្តសាមញ្ញមួយដែលអាចកម្ចាត់បញ្ហាអង្គែបាន។ ទឹកក្រូចឆ្មាកម្ចាត់ជាតិខ្លាញ់ដែលលើស និងអំបិលកម្ចាត់បន្ទះអង្គែនៅលើស្បែកក្បាល។ វិធីធ្វើគឺលាយទឹកក្រូចឆ្មា និង អំបិលរួចញីលើស្បែកក្បាលប្រមាណ ៥ ទៅ ១០ នាទី រួចលាងសម្អាតនឹងទឹកស្អាតចេញ។
ប្រើប្រាស់វិធីខាងលើ អ្នកមិនបាច់បារម្ភអំពីផលប៉ះពាល់ដោយជាតិគីមី ហើយវាចំណាយលុយអស់តិចទៀត។ តោះសាកល្បងឥឡូវនេះទៅ!