ជាទូទៅ ធ្លាប់តែឃើញគេប្រើប្រាស់ដំឡូងបារាំងជាគ្រឿងផ្សំសម្រាប់ធ្វើម្ហូប តែថ្ងៃនេះយើងខ្ញុំនឹងបង្ហាញជូនមិត្តនារីពីវិធីប្រើប្រាស់វាសម្រាប់ធ្វើម៉ាសបិទមុខថែរក្សាសម្រស់វិញម្ដង។
គ្រឿងផ្សំដែលអ្នកត្រូវការមាន ដំឡូងបារាំង ១មើម ទឹកឃ្មុំ ១ ស្លាបព្រាបាយ និងទឹកដោះគោជូរ ១ កំប៉ុង។
ចំពោះវិធីធ្វើវិញគឺអ្នកត្រូវ ចិតដំឡូងបារាំងជា ៣ទៅ៤ កំណាត់ រួចដាក់ស្ងោរឲ្យសាច់ដំឡូងទន់ល្មម។ ជំហានបន្ទាប់អ្នកត្រូវកិនដំឡូងបារាំងដែលស្ងោររួចឲ្យម៉ត់ល្អ បន្ទាប់មកចាក់យ៉ាអួចូលល្បាយប្រមាណ ១ កំប៉ុង និង ទឹកឃ្មុំ ១ ស្លាបព្រាបាយ។ កូរគ្រឿងផ្សំទាំង ៣ ចូលគ្នាឲ្យសព្វ រហូតទទួលបានម៉ាសដែលមានល្បាយខាប់ល្មមសម្រាប់ធ្វើការលាបលើផ្ទៃមុខ។ រក្សាម៉ាសទុកក្នុងទូទឹកកកឲ្យត្រជាក់បន្តិច សឹមយកមកប្រើប្រាស់។
សម្រាប់វិធីប្រើគឺអ្នកត្រូវលាងសម្អាតផ្ទៃមុខឲ្យបានស្អាតជាមុនសិន រួចយកម៉ាសដែលបានក្លាស្សេទុក យកមកលាបពេញផ្ទៃមុខ និង ក ដើម្បីទទួលបានប្រសិទ្ធភាពទាំងព្រម។ អប់ម៉ាសទុកលើមុខឲ្យស្ងួត ប្រមាណពី ១០ទៅ ១៥នាទី សឹមលាងមុខចេញជាការស្រេច។
អត្ថប្រយោជន៍នៃម៉ាសដំឡូងបារាំងគឺវាអាចជួយបំបាត់ស្លាកស្នាមនៅលើមុខ ជួយឲ្យមុខស ម៉ត់ និងមានសំណើម បំបាត់បញ្ហាស្បែកស្រអាប់ ឬសមិនស្មើគ្នា ជួយព្យាបាលស្នាមអុជខ្មៅ និង ធ្វើឲ្យស្បែកមុខតឹងណែន៕
