សម្រាប់អ្នកដែលតែងតែធ្វើការនៅមុខអេក្រង់កុំព្យូទ័រក្នុងរយៈពេលយូរ ឬចូលចិត្តលេងទូរស័ព្ទច្រើននឹងធ្វើឱ្យភ្នែកឆាប់ឡើងស្រវាំង ឈឺចុករោយ និងឡើងក្រហម។ វាមើលទៅហាក់បីដូចជាបញ្ហាតូចមួយប៉ុណ្ណោះ ប៉ុន្តែប្រសិនបើយើងធ្វេសប្រហែសមិនបានថែទាំត្រឹមត្រូវទេ វានឹងបណ្ដាលឱ្យកាន់តែធ្ងន់ធ្ងរ ឬអាចឈានដល់មើលលែងឃើញ។ ដូច្នេះថ្ងៃនេះ យើងខ្ញុំនឹងចែកនូវ ៤ វិធីសាស្រ្តជួយព្យាបាលភ្នែកដោយខ្លួនឯង។
ទី ១៖ ជំហានដំបូងគឺគេផ្ដល់យោបល់ឱ្យជ្រើសរើសទឹកថ្នាំបន្តក់ភ្នែកដើម្បីជួយព្យាបាលភ្នែកក្រហម។ យើងអាចជ្រើសរើសទឹកបន្តក់ភ្នែកសូដ្យូមក្លរួដើម្បីលាងជម្រះក្អែល និងរក្សាភ្នែកឱ្យស្អាត។ ធ្វើបែបនេះ ៥-៦ដងក្នុងមួយថ្ងៃជាមួយបរិមាណសមល្មម បន្ទាប់មកប្រើសម្លីស្អាតមកជូត ប៉ុន្តែសំឡីត្រូវចាំថាសម្លីមួយបន្ទះប្រើបានតែភ្នែកមួយចំហៀងប៉ុណ្ណោះ។
ទី ២៖ របៀបមួយទៀតគឺយើងត្រូវត្រាំកន្សែងក្នុងទឹកក្តៅឧណ្ហៗ ហើយពួតវាឱ្យស្ងួត បន្ទាប់មកយកកន្សែងមកស្អំលើភ្នែកប្រហែល ១០ នាទី ដើម្បីកាត់បន្ថយភាពមិនស្រួលបានយ៉ាងឆាប់រហ័ស។ សីតុណ្ហភាពខ្ពស់នឹងជួយពង្រីកសរសៃឈាម បង្កើនលំហូរឈាមទៅកាន់ត្របកភ្នែកដើម្បីកាត់បន្ថយការឈឺចាប់ និងរលាក។ ក្នុងពេលជាមួយគ្នានេះ វាក៏អាចបង្កើនបរិមាណប្រេងដែលលាក់នៅលើត្របកភ្នែក និងការពារភ្នែកពីការស្ងួត។ សូមចំណាំថាស្បែកនៅជុំវិញភ្នែកគឺស្តើង និងងាយប្រតិកម្ម ដូច្នេះកុំប្រើទឹកដែលក្តៅពេកព្រោះវាអាចបណ្តាលឱ្យខូច។
ទី ៣៖ ប្រសិនបើការប្រើកន្សែងក្ដៅមិនមានប្រសិទ្ធភាព យើងអាចធ្វើវិធីសាស្រ្តផ្ទុយដោយយកកន្សែងទៅត្រាំក្នុងទឹកត្រជាក់ ហើយស្អំលើភ្នែកក៏អាចជួយសម្រាលអាការឈឺភ្នែកបានភ្លាមៗដែរ។ ការស្អំកន្សែងត្រជាក់អាចជួយបន្ថយការហើម និងអាការៈរមាស់ដែលបណ្តាលមកពីការរលាកផងដែរ។ ទោះជាយ៉ាងណាក៏ដោយ របៀបនៃការប្រើក៏មិនខុសពីកន្សែងក្ដៅប៉ុន្មានដែរ គឺគួរតែប្រយ័ត្នចំពោះសីតុណ្ហភាព។
ទី ៤៖ សម្រាប់អ្នកដែលមានបញ្ហាភ្នែកក្រហមរ៉ាំរ៉ៃ ហេតុផលមួយក្នុងនោះអាចបណ្ដាលមកពី Contact Lenses ដែលយើងកំពុងប្រើដែរ។ យើងមិនអាចប្រាកដបាន ១០០ភាគរយ នោះទេថាការប្រើប្រាស់ Contact Lenses សុទ្ធតែមានប្រយោជន៍ទាំងអស់នោះទេ។ ជួនកាលការសម្អាតមិនបានត្រឹមត្រូវ ឬប្រើរយៈពេលយូរអាចនឹងបណ្ដាលឱ្យប៉ះពាល់ដល់កែវភ្នែកបានផងដែរ។ ដូច្នេះយើងគួរព្យាយាមផ្លាស់ប្ដូរមកពាក់វែនតាធម្មតាជំនួសឱ្យ Contact Lenses ម្ដងម្កាលគឺជារឿងល្អ ៕
