នៅក្នុងអត្ថបទនេះ យើងខ្ញុំសូមផ្ញើជូនដល់ប្រិយមិត្ត ដែលតែងតែមានបញ្ហាឈឺបំពង់កញឹកញាប់។
បើអ្នកមានបញ្ហាបំពង់កស្រាលៗនិងមិនចង់លេបថ្នាំពេទ្យ លោកអ្នកអាចសាកល្បងប្រើគ្រឿងផ្សំធម្មជាតិងាយៗដែលអាចរកបាននៅផ្ទះជំនួសដែរ។
ខាងក្រោមនេះ យើងនឹងបង្ហាញអាហារដែលមានប្រសិទ្ធភាពខ្ពស់ក្នុងការថែរក្សាបំពង់ករបស់យើង និងការពារបាក់តេរី និងការរលាកផ្សេងៗផងដែរ៖
ខ្ញី៖ បើនឹកដល់ថ្នាំរលាកបំពង់ក ខ្ញីគឺជាជម្រើសទីមួយដ៏មានប្រសិទ្ធភាព។ ទឹកខ្ញី ឬតែខ្ញីមានឥទ្ធិពលប្រឆាំងនឹងការរលាក ជាថ្នាំបំបាត់ការឈឺចុកចាប់ និងព្យាបាលបំពង់កបានយ៉ាងពូកែ។
ទឹកឃ្មុំនិងក្រូចឆ្មារ៖ អាហារដែលល្អបំផុតសម្រាប់បំពង់កគឺល្បាយទឹកឃ្មុំនិងក្រូចឆ្មារ។ ជួយព្យាបាលអាការៈរលាកបំពង់ក ហើយក៏មានប្រសិទ្ធភាពការពារភ្នាក់ងារបង្ករោគបានផងដែរ។
ផ្លែចេក៖ ចេកមានរសជាតិផ្អែមនិងទន់ងាយស្រូលបញ្ជូនតាមបំពង់កទៅប្រព័ន្ធរំលាយអាហារ។ ផ្លែចេកមានកំហាប់ Glycemic ទាបនិងសម្បូរទៅដោយ វីតាមីន B6 ប៉ូតាស្យូម និងវីតាមីនសេ ដែលល្អសម្រាប់ប្រព័ន្ធរំលាយអាហារ និងបំពង់ករបស់យើងផងដែរ។
ទឹកអំបិល៖ ទឹកអំបិលអាចនឹងមិនផ្តល់ឱ្យអ្នកនូវការធូរស្បើយពីការឈឺបំពង់កភ្លាមៗ ប៉ុន្តែវានៅតែជាមធ្យោបាយដោះស្រាយដ៏មានប្រសិទ្ធិភាពក្នុងការសម្លាប់បាក់តេរី ខណៈដែលវាបន្ធូរអាការស្លេស្ម និងបន្ថយការឈឺចាប់។ វិធីងាយៗគ្រាន់តែលាយអំបិលកន្លះស្លាបព្រាកាហ្វេចូលក្នុងទឹកក្តៅ ២៣០មីលីលីត្រ ហើយខ្ពុរចេញ។
ស៊ុបការ៉ុត៖ ជំនួសឱ្យការញ៉ាំការ៉ុតឆៅ ស៊ុបការ៉ុតគឺជាអាហារដ៏ល្អឥតខ្ចោះដើម្បីព្យាបាលឈឺបំពង់ក។ ម្ហូបនេះសម្បូរទៅដោយសារធាតុចិញ្ចឹមដូចជា វីតាមីនអា វីតាមីនសេ និងប៉ូតាស្យូម។
ផ្កាក្លាំពូក្រៀម៖ ក្លាំពូជារុក្ខជាតិដែលមានប្រសិទ្ធភាពណាស់ក្នុងការព្យាបាលការឈឺបំពង់ក។ វាមានលក្ខណៈប្រឆាំងនឹងផ្សិត ជាថ្នាំស្ពឹកដែលអាចបំបាត់ការឈឺចាប់បំពង់កដែលបណ្តាលមកពីរលាកបាន៕
