បើនិយាយពីផ្លែបឺរ អ្នកប្រាកដជាដឹងថា វាជាផ្លែឈើដែលមានរសជាតិឆ្ងាញ់មួយបែប។ ជាមួយនឹងរសជាតិឆ្ងាញ់ ផ្លែបឺរ ក៏នៅមានសារធាតុល្អៗជាច្រើនទៀត ដែលមានប្រយោជន៍ចំពោះសុខភាព។
ក្រៅពីល្អចំពោះសុខភាពហើយ ផ្លែបឺរថែមទាំងផ្តល់អត្ថប្រយោជន៍ជាច្រើនទៀតចំពោះសម្រស់។ ហេតុនេះហើយ ប្រិយមិត្ត មិនគួរមើលរំលងពីអាថ៌កំបាំងថែរក្សាសម្ផស្សផ្សំចេញពីផ្លែបឺរ ដែលអាចយកទៅអនុវត្តនៅផ្ទះ ចំណាយលុយតិច ចំណេញពេលវេលា និងទទួលបានប្រសិទ្ធិភាពខ្ពស់។
សម្រាប់ស្បែកមុខ៖ អ្នកអាចយកសាច់ផ្លែបឺរស្រស់ ទៅកិនឲ្យម៉ដ្ឋ បន្ទាប់មកយកទៅបិទលើផ្ទៃមុខដែលបានសម្អាតរួច ទុកចោលរយៈពេលពី ១៥-២០នាទី។ បន្ទាប់មកទៀត ត្រូវលាងមុខជាមួយនឹងទឹកក្តៅឧណ្ណៗ សឹមលាងជាមួយនឹងទឹកត្រជាក់តាមក្រោយ។ អត្ថប្រយោជន៍របស់វាគឺ ជួយធ្វើឲ្យស្បែកមុខ ទន់ ភ្លឺរលោងបែបធម្មជាតិ។
ប្រើសម្រាប់លាងមុខ៖ អ្នកត្រូវការ ផ្លែបឺរស្រស់១ ស៊ុតយកតែផ្នែកក្រហម១គ្រាប់ ទឹកដោះគោស្រស់១ស្លាបព្រាបាយ។ បន្ទាប់មកលាយគ្រឿងផ្សំទាំងអស់ចូលគ្នា ហើយមកយកមកលាបនិងធ្វើការម៉ាស្សាថ្នមៗលើមុខ ទុកចោលប្រមាណ ១៥នាទី រួចលាងនឹងទឹកក្តៅឧណ្ណៗ។ អាចធ្វើ ២-៣ដង ក្នុងមួយសប្តាហ៍។ អត្ថប្រយោជន៍របស់វាគឺស័ក្តិសមសម្រាប់ស្បែកដែលឆាប់ប្រតិកម្មជាមួយផលិតផលគ្រឿងសម្អាងផ្សេងៗ។ ជួយឲ្យស្បែកមុខភ្លឺថ្លា ដោយមិនពាល់ដល់សុខភាពស្បែក។
ប្រើនៅលើបបូរមាត់៖ អ្នកត្រូវមាន ផ្លែបឺរទុំមួយចំហៀង ប្រេងអូលីវ១ស្លាបព្រាបាយ។ បន្ទាប់មក លាយគ្រឿងផ្សំទាំងពីរចូលគ្នា និងមកលាបលើបបូរមាត់ ហើយទុកចោល២៥នាទី រួចចាំលាងចេញជាមួយនឹងទឹកក្តៅឧណ្ណៗ។ គួរធ្វើឲ្យបាន២ដង ក្នុងមួយសប្តាហ៍។ អត្ថប្រយោជន៍របស់វាគឺ ជួយធ្វើឲ្យបូរមាត់ទន់ បំបាត់ជ្រួញ ផ្តល់សំណើម។
ប្រើនៅលើសក់៖ អ្នកត្រូវមាន ផ្លែបឺរទុំមួយផ្លែ ប្រេងដូង ឬ ប្រេងអូលីវ ៣ស្លាបព្រាបាយ។ សូមលាយគ្រឿងផ្សំទាំងពីរចូលគ្នាឲ្យសព្វល្អ បន្ទាប់មកយកទៅលាបម៉ាស្សាថ្នមៗចាប់ពីគល់រហូតដល់ចុងសក់ បន្ទាប់មកទៀតត្រូវលាងជាមួយនឹងសាប៊ូកក់សក់និងទឹកស្អាតចេញជាការស្រេច។ គួរធ្វើឲ្យបានទៀងទាត់ ២ដងក្នុងមួយសប្តាហ៍ អ្នកនឹងឃើញលទ្ធផលគួរឲ្យភ្ញាក់ផ្អើលមិនខាន។ អត្ថប្រយោជន៍របស់វាគឺ អាចប្រើធ្វើម៉ាស់អប់សក់ វាមានតួនាទីយ៉ាងសំខាន់ ដើម្បីជួយឲ្យសក់ទន់រលាស់ ភ្លឺចែងចាំង ជាពិសេសអាចជំរុញដល់ការលូតលាស់នៃសរសៃសក់ទៀតផង។
ប្រើសម្រាប់ស្បែកមុខមុន៖ អ្នកត្រូវមានផ្លែបឺរទុំ និងប្រេងអូលីវ។ សូមដាក់ផ្លែបឺរទុំ និងប្រេងអូលីវ កិនបញ្ចូលគ្នា ហើយយកវាទៅលាបនៅលើមុខ ទុកចោលពី២០-៣០នាទី សឹមលាងចេញនឹងទឹកស្អាត។ អត្ថប្រយោជន៍របស់វាគឺជួយឲ្យមុនក្រៀម និងក្រាបមុខជាងមុន៕