ក្អកគឺជាវិធីមួយដែលរាងកាយបញ្ចេញដើម្បីកម្ចាត់ចោលសារធាតុដែលនាំឲ្យរមាស់ ឬដែលធ្វើឲ្យរលាក។ នៅពេលដែលមានអ្វីមួយធ្វើឲ្យរមាស់នៅក្នុងបំពង់ក ឬនៅក្នុងផ្លូវដង្ហើម ប្រព័ន្ធប្រសាទនឹងបញ្ជូនព័ត៌មានដល់ខួរក្បាលឲ្យធ្វើការកន្ត្រាក់សាច់ដុំនៅត្រង់ពោះ និងទ្រូងរបស់យើងដើម្បីបញ្ចេញសារធាតុនោះចេញមកក្រៅ។ ការក្អក គឺជារេផ្លេចមួយដ៏សំខាន់ដើម្បីការពាររាងកាយយើងពី សារធាតុបង្កឲ្យរមាស់ដូចជា ស្លេស្ម ផ្សែង និង សារធាតុបង្កអាលាក់ហ្ស៊ី ដូចជា ធូលី លំអងផ្កា និង ផ្សិត ជាដើម។ សម្រាប់ប្រធានបទរបស់យើងខ្ញុំពេលនេះវិញគឺជារូបមន្តព្យាបាលក្អកពីបញ្ហាស្លេស្មយ៉ាងពូកែតែម្តង។
ទឹកឃ្មុំ និង សម្បកក្រូច៖ ចិតសម្បកក្រូចជាបន្ទះៗដាក់ក្នុងចាន បន្ទាប់មកចាក់ទឹកឃ្មុំចូល និងច្របល់ឱ្យជ្រាបសព្វចូលគ្នា។ បន្ទាប់មកទៀតដាក់វាចំហុយ ឬដាក់ចូលក្នុងឆ្នាំងដុតកម្តៅរយៈពេលប្រហែល ១០ ទៅ ១៥នាទី រហូតដល់ទទួលបានល្បាយខាប់។ ទុកវាឱ្យត្រជាក់ ទទួលទានឱ្យបាន ២ ទៅ ៣ដងក្នុងមួយថ្ងៃ ញ៉ាំ១ម្តង ១-២ស្លាបព្រាបាយ។ ពេលញ៉ាំរួច អ្នកអាចដាក់អំបិលបន្តិចមួយមាត់ រង់ចាំ ៥វិនាទីសឹមលេបចូលសន្សឹមៗដើម្បីកាត់បន្ថយអាការៈឈឺបំពង់ក រមាស់ក ស្អកក ជាពិសេសអាការៈក្អក។
ត្រួយអំពិល ក្រូចឆ្មា និង ខ្ញី៖ យកត្រួយអំពិល ៣បាច់លាយជាមួយចំណិតខ្ញី រួចចាក់ទឹកចូល ២ពែង បន្ទាប់មកដាំវារយៈពេល ៣០នាទី ឬរហូតដល់ទឹកក្នុងឆ្នាំងសល់ប្រហែល ១ពែង។ បន្ថែមទឹកប្រហែលកន្លះពែងចូល ហើយបន្តរម្ងាស់រហូតដល់ទទួលបានល្បាយខាប់។ ច្របាច់ក្រូច ៥ផ្លែដាក់ចូល រួចកូរឱ្យសព្វស្មើសាច់គ្នា។ ចំពោះវិធីប្រើវិញគឺ មនុស្សជំទង់ពិសារ ៤ដងក្នុងមួយថ្ងៃ ម្តង១ស្លាបព្រាបាយ។ រីឯក្មេងក៏ញ៉ាំ ៤ដងដែរក្នុងមួយថ្ងៃ តែពិសារម្តង ១ស្លាបព្រាកាហ្វេ។ ល្បាយនេះគួររក្សាទុកក្នុងទូរទឹកកក។
ខ្ទឹមស៖ ចិតសម្បកខ្ទឹមស ២ ទៅ ៣ក្លែបដាក់ចូលក្នុងកែវតូចមួយ ដាក់ស្ករចូល ១ស្លាបព្រាបាយ និងទឹកកន្លះពែង។ ដាំរយៈពេលប្រហែល ១៥នាទីរួចលើកចុះ។ រង់ចាំឱ្យវាក្តៅអ៊ុនៗសឹមទទួលទាន។ពិសារ ២-៣ដងក្នុងមួយថ្ងៃ ក្រោយមួយសប្តាហ៍ ក្អកនឹងបាត់ទាំងស្រុង។ មនុស្សធំក៏អាចប្រើវិធីនេះបានដែរ តែត្រូវការខ្ទឹមសពី ៧-៨ក្លែប និងស្ករស ២ស្លាបព្រាបាយ។
ដោយឡែក សម្រាប់អ្នកដែលមានបញ្ហាក្អកដែលបណ្តាលមកពីជម្ងឺផ្សេងៗ សូមលោកអ្នកទៅពិគ្រោះជាមួយគ្រូពេទ្យជំនាញ ដើម្បីបញ្ចៀសបញ្ហាធ្ងន់ធ្ងរដែលអាចកើតឡើង៕
