មានជំងឺលើសឈាម ច្បាស់ជាមានអារម្មណ៍តានតឹងខ្លះៗមិនខាន ពិសេសនៅពេលឃ្លានម្តងៗ ញ៉ាំនេះមិនបាន ញ៉ាំនោះមិនបាន ឲ្យតែរបស់ឆ្ងាញ់ សុទ្ធតែញ៉ាំមិនបាន។ មិនមែនអ៊ីចឹងទេ ទោះលើសឈាម ក៏ត្រូវតែញ៉ាំអាហារមានវីតាមីន ប្រូតេអ៊ីន រួមនឹងសារធាតុចិញ្ចឹមឲ្យបានគ្រប់គ្រាន់ ដើម្បីជួយសុខភាពល្អឡើងវិញ គ្រាន់តែថា អាហារ ៣ប្រភេទនេះ គ្នាយើងមានជំងឺលើសឈាមចៀសបានក៏គួរចៀសដែរទៅ។
អាហារមានជាតិអំបិលខ្ពស់៖ ត្រូវចៀសវាងអាហារកំប៉ុង និងស៊ុប ព្រោះពពួកអាហារទាំងនេះ មានផ្ទុកជាតិអំបិលយ៉ាងច្រើន។ ជាមួយគ្នានេះ ស៊ុបសណ្តែកក្រហមកក និងទឹកដោះគោសម្លាប់មេរោគរួច អាចញ៉ាំបានសម្រាប់គ្នាយើងមានជំងឺលើសឈាម ប៉ុន្តែដំឡូងបារាំងកញ្ចប់ សាច់កែច្នៃ និងអាហារក្លាស្សសុទ្ធតែផ្ទុកជាតិសូដ្យូមខ្ពស់។ នៅពេលយើងញ៉ាំសារធាតុនេះច្រើន នឹងធ្វើឲ្យសម្ពាធឈាមយើងកាន់តែឡើងខ្ពស់ នាំឲ្យកើនហានិភ័យសុខភាពជាច្រើន ពិសេសជំងឺសរសៃឈាមបេះដូងតែម្តង។
ជាតិអាល់កុល៖ ការផឹកគ្រឿងស្រវឹងច្រើននឹងធ្វើឲ្យសម្ពាធឈាមកាន់តែខ្ពស់។ ស្ត្រីគួរកាត់បន្ថយការផឹកគ្រឿងស្រវឹងយ៉ាងច្រើនត្រឹមតែ២ កែវក្នុងមួយថ្ងៃ ខណៈប្រុសៗ អាចផឹកច្រើនបំផុតត្រឹម ៣ កែវក្នុងមួយថ្ងៃ។ តាមស្តង់ដារផឹកគ្រឿងស្រវឹងសម្រាប់គ្នាយើងលើសឈាម អាចផឹកពី ២ទៅ៣ កំប៉ុង ឬស្រាមួយកែវតូច។
អាហារខ្លាញ់៖ ជំងឺលើសឈាម ភាគច្រើនទំនងជាកើតឡើងនៅពេលយើងលើសទម្ងន់ ។ យើងគួរតែរក្សាសន្ទស្សន៍ទម្ងន់ធៀបនិងកម្ពស់របស់ខ្លួនដើម្បីធ្វើឲ្យរាងកាយមានទម្ងន់សមល្មម។ ចំពោះប្រុស ដែលមានរង្វង់ចង្កេះធំជាង ៩១សង់ទីម៉ែត្រ រីឯស្រីៗធំជាង ៨១សង់ទីម៉ែត្រ គឺប្រឈមខ្ពស់កើតជំងឺលើសឈាម។ វិធីសាស្ត្រល្អបំផុតជួយសម្រកទម្ងន់យ៉ាងមានប្រសិទ្ធភាព គឺកាត់បន្ថយការញ៉ាំអាហារខ្លាញ់។ យើងអាចកាត់បន្ថយការញ៉ាំបាន តាមរយៈការកាត់បន្ថយញ៉ាំអាហារបំពង ក្រែម និងពពួកនំដុត។ អ្វីកាន់តែចាំបាច់បំផុត ត្រូវកាត់បន្ថយការញ៉ាំខ្លាញ់ឆ្អែត ដែលជាសារធាតុបង្កើនហានិភ័យកកស្ទះសរសៃឈាមអាក់ទែ មានដូចជាពពួកខ្លាញ់នៅក្នុងសាច់ក្រហម និងផលិតផលសម្រាប់ចម្អិនអាហារ សម្បូរខ្លាញ់ និងប្រេងជាដើម។ យើងត្រូវជ្រើសយកសាច់ត្រី សាច់គ្មានខ្លាញ់ និងទឹកដោះគ្មានជាតិខ្លាញ់ មកញ៉ាំជំនួសអាហារទាំងនោះ ដើម្បីជួយឲ្យសុខភាពយើងកាន់តែប្រសើរឡើងវិញ៕
