នៅពេលវ័យកាន់តែចាស់ ផ្ទៃមុខបានប្រែប្រួល ទៅតាមសណ្ឋាននៃស្បែករបស់មនុស្សម្នាក់ៗ ដូចជា ស្បែកជ្រីវជ្រួញ និងស្នាមអុចខ្មៅជាដើម។
ទោះយ៉ាងណា គេរកឃើញថា ម៉ាសផ្សំពីការ៉ុតនិងស៊ុត មានប្រសិទ្ធភាពក្នុងការដោះស្រាយបញ្ហាផ្ទៃមុខរបៀបនេះផងដែរ។ ការ៉ុតសម្បូរទៅដោយវីតាមីន A និងសារធាតុប្រឆាំងអុកស៊ីតកម្ម។ ការបរិភោគការ៉ុតរៀងរាល់ថ្ងៃនឹងជួយពង្រឹងសុខភាពសក់, ឆ្អឹង, ក្រចកដៃ, និងភ្នែក។ ការសិក្សាមួយចំនួនក៏បានណែនាំថា ការ៉ុតអាចកាត់បន្ថយគ្រោះថ្នាក់ជំងឺគាំងបេះដូងនិងជំងឺមហារីកមួយចំនួន។ យើងអាចធ្វើម៉ាសការ៉ុត ដើម្បីដោះស្រាយស្បែកជ្រីវជ្រួញ និងស្នាមអុចខ្មៅតាមរបៀបខាងក្រោម៖
យកការ៉ុតមួយផ្លែតូចកិនឲ្យម៉ត់ល្អ ហើយយកការ៉ុតដែលកិនហើយ១ស្លាបព្រា លាយជាមួយពងមាន់មួយ ច្របល់ឲ្យសព្វ រួចយកមកលាបលើផ្ទៃមុខនិងក រក្សាទុក៣០នាទី ចាំលាងជម្រះចេញជាមួយទឹកត្រជាក់។ ដើម្បីរក្សាឲ្យស្បែកឲ្យមានសំណើម អ្នកអាចលាបប្រេងផ្តល់សំណើមដល់ស្បែក ឬប្រេងអាល់ម៉ុន ក្រោយបិទម៉ាសនេះរួច។
ដើម្បីទទួលបានប្រសិទ្ធភាព អ្នកគួរប្រើម៉ាសផ្សំពីការរ៉ុតនិងស៊ុតនេះ រយៈពេល១០ថ្ងៃជាប់ៗគ្នា បន្ទាប់មកគួរផ្អាកប្រើ១សប្តាហ៍ ហើយចាំបន្តប្រើម៉ាសនេះ ២ទៅ៣ដងក្នុងមួយសប្តាហ៍។ ធ្វើបែបនេះក្នុងរយៈពេល១ខែ ស្នាមខ្មៅៗលើផ្ទៃមុខនឹងរលាយបាត់ ហើយស្បែករបស់អ្នកនឹងកាន់តែទន់រលោង ហើយស្រស់ថ្លា៕
