ដំឡូងជ្វាពណ៌ស្វាយ យើងអាចងាយរកទិញបាន នៅតាមផ្សារដែលគេអាំងឆ្អិនស្រាប់ដាក់លក់តាមផ្លូវ។ មិនត្រឹមតែមានរសជាតិឆ្ងាញ់ ដំឡូងជ្វាពណ៌ស្វាយ ដែលគេអាចហៅម្យ៉ាងទៀតថា ដំឡូងទឹកនោះ ផ្ទុកសារធាតុមានអត្ថប្រយោជន៍សម្រាប់សុខភាពច្រើននឹកស្មានមិនដល់។
ដំឡូងជ្វាពណ៌ស្វាយមួយដុំ ឬប្រហែល ១០០ក្រាម ផ្តល់សារធាតុចិញ្ចឹមដល់រាងកាយជាច្រើនដូចជា កាឡូរី ប្រូតេអ៊ីន ហ្វៃបឺរ សូដ្យូម ជាពិសេស ដំឡូងនេះសម្បូរដោយសារធាតុ Anthocyanins ដែលការសិក្សាបានបញ្ជាក់ថា វាជួយកាត់បន្ថយសម្ពាធឈាមខ្ពស់ក្នុងរាងកាយ បន្ថយហានិភ័យជំងឺហើមរលាក ប្រឆាំងមហារីក និងជំងឺទឹកនោមផ្អែមប្រភេទ២។
សម្បូរសារធាតុប្រឆាំងអុកស៊ីតកម្ម និងប្រឆាំងរោគមហារីក៖ ដំឡូងពណ៌ស្វាយ មានសារធាតុជួយកោសិការបស់រាងកាយឲ្យចាកឆ្ងាយពីការខូចខាត ដែលបង្កដោយម៉ូលេគុលម្យ៉ាងហៅថា រ៉ាឌីកាល់សេរី។ រ៉ាឌីកាល់សេរីនេះ មានជាប់ទាក់ទងនឹងរោគមហារីក និងជំងឺបេះដូង ទឹកនោមផ្អែម ព្រមទាំងជំងឺសរសៃប្រសាទ ហើយសារធាតុប្រឆាំងអុកស៊ីតកម្មមាននៅក្នុងដំឡូងជ្វាពណ៌ស្វាយ នឹងបង្ការពីជំងឺទាំងនេះ។
មិនប៉ះពាល់សារធាតុស្ករក្នុងឈាម៖ ដំឡូងនេះមានអត្រាកាបូនអ៊ីដ្រាតទាប ពោលគឺ ២៤ ដែលមានន័យថាកម្រិតនេះ មានធាតុកាបូនអ៊ីដ្រាតបំបែកជាស្ករយឺត ហើយមិនប៉ះពាល់កម្រិតគ្លុយកូស ឬជាតិស្ករក្នុងឈាម ហេតុនេះកាបូនអ៊ីដ្រាតពីដំឡូងនេះបម្លែងជាថាមពល ជាជាងជំរុញជាតិស្ករ។
អាចបន្ថយហានិភ័យជំងឺហឺត៖ ការស្រាវជ្រាវប្រមាណ ៤០ ករណី បានរកឃើញថា អត្រាជំងឺហឺតកើតលើយុវជនច្រើន គឺជាប់ពាក់ព័ន្ធនឹងកង្វះវីតាមីន A និងវីតាមីន C។ រាងកាយស្រូបយកវីតាមីន A និងវីតាមីន C ច្រើន អាចកាត់បន្ថយហានិភ័យជំងឺហឺតបាន ហើយសារធាតុទាំងនេះសម្បូរនៅក្នុងដំឡូងជ្វាពណ៌ស្វាយ។
ជួយប្រព័ន្ធរំលាយអាហារ៖ ដំឡូងសម្បកពណ៌ត្នោត សាច់ពណ៌ស្វាយដ៏ឈ្ងុយឆ្ងាញ់នេះ អាចជួយសម្រួលប្រព័ន្ធរំលាយអាហាររបស់យើងដើរស្រួលបាន។ នេះក៏ព្រោះតែដំឡូងទឹកនេះ មានធាតុកាបូនអ៊ីដ្រាតម្យ៉ាង ដែលជំរុញឲ្យមានបាក់តេរីល្អ ឈ្មោះ Bifido ដែលជួយបំបែកកាបូនអ៊ីដ្រាត និងសារធាតុហ្វៃបឺរ (សរសៃ) ជំរុញឲ្យដំណើរការរំលាយបានយ៉ាងល្អ។ ការសិក្សាមួយទៀត ក៏បានពិសោធបង្ហាញដែរថា ដំឡូងពណ៌ស្វាយមានសារធាតុប្រឆាំងនឹងដំណើររលាកនៃពោះវៀនធំផងដែរ៕
