ក្រូចឆ្មាមិនត្រឹមតែជាគ្រឿងផ្សំដ៏ក្នុងមុខម្ហូបនោះទេ តែវាក៏អាចប្រើប្រាស់ក្នុងផ្នែកសម្រស់ផងដែរ។ ជាការពិត បើលោកអ្នកចង់ធ្វើស្រ្កាប់ ធ្វើមុខឲ្យសក៏បាន បាត់មុនក្បាលខ្មៅក៏បាន ក្រូចឆ្មាជួយបានទាំងអស់។ អញ្ចឹងមកតាមដានវិធីប្រើក្រូចឆ្មាដើម្បីសម្រស់ទាំងអស់គ្នា។
ជួយស្បែកមុខឲ្យសខ្ចីភ្លឺរលោង៖ ក្រូចឆ្មាសម្បូរដោយវីតាមីន C អាស៊ីតស៊ីទ្រិចដែលច្រើនជាងគេក្នុងចំណោមផ្លែឈើទាំងអស់។ ម្ល៉ោះហើយ វាមានលទ្ធភាពធ្វើឲ្យស្បែកភ្លឺថ្លាជាងមុន និងសរលោងផងដែរ។ ចំពោះវីតាមីន C គឺជាសារធាតុប្រឆាំងនឹងអុកស៊ីតកម្មល្អបំផុត ក្នុងការជួយជួសជុលនិងផលិតខូឡាជែនក្នុងស្បែកបានយ៉ាងល្អផងដែរ។ មានន័យថា ស្នាមអុជខ្មៅ រួមទាំងស្បែកសមិនស្មើគ្នា គឺសុទ្ធតែក្រូចឆ្មាអាចធ្វើបានទាំងអស់។ តែកុំភ្លេចលាបឡេការពារកម្តៅថ្ងៃលើស្បែកមុនចេញទៅក្រៅផង បន្ទាប់ពីអ្នកបានលាបទឹកក្រូចឆ្មានេះ ព្រោះអាស៊ីតស៊ីទ្រិចពីក្រូចឆ្មានឹងធ្វើឲ្យស្បែកងាយរងប្រតិកម្មពី UV បំផុត។
កាត់មុនក្បាលខ្មៅដល់ឬស៖ អ្នកអាចចិតផ្លែក្រូចឆ្មាមួយចំហៀង ហើយយកមកត្រដុសលើតំបន់ដែលមានមុន ដោយទុកចោលប្រហែល១៥នាទី ចាំលាងចេញ។ អនុវត្តឲ្យបានទៀងទាត់ នោះមុននឹងលែងកើតទៀតហើយ។
ផ្តល់សំណើមដល់ស្បែកមុខ៖ លាយទឹកក្រូចឆ្មា និងទឹកដូងចូលគ្នា ចំនួន២ -៣ តំណក់ រួចយកមកជូតលើផ្ទៃមុខ។ ទឹកដូង បង្កើនសំណើម សក្កិសមបំផុតសម្រាប់ស្បែកស្ងូត ហើយក្រូចឆ្មាវិញជួយឲ្យស្បែកសខ្ចី។
ជួយកាត់បន្ថយជាតិខ្លាញ់លើមុខ និងបង្រួញរន្ធរោម៖ អ្នកអាចសាកល្បងប្រើទឹកក្រូចឆ្មាលាយជាមួយទឹកឃ្មុំ ចំនួន២តំណក់ ហើយលាបលើមុខប្រហែល២០នាទី សឹមលាងមុខចេញ។ ធ្វើបែបនេះ ២ -៣ ដងក្នុងមួយសប្តាហ៍ រន្ធរោមនឹងប្រែជាតូច ហើយបញ្ហានឹងរលាយបាត់។
ធ្វើជាស្រ្កាប់ដុសបបូរមាត់៖ ងាយៗដោយគ្រាន់តែយកទឹកក្រូចឆ្មាបន្តិចបន្តួចលាបលើបបូរមាត់ មុនចូលគេង។ រួចនៅពេលព្រឹក សឹមលាងចេញ នោះវានឹងជម្រុះចោលអស់នូវកោសិកាចាស់ៗ ដែលធ្វើឲ្យបបូរមាត់មើលទៅរលោងបានយ៉ាងងាយ៕
