រូបមន្តសុខភាពថ្ងៃនេះគឺជាការប្រើប្រាស់សណ្តែកក្រហម ជួយឲ្យអ្នកស្រកទម្ងន់ ស្រកក្បាលពោះ ចង្កេះតូចជាងមុន និងសំខាន់អាចជួយលើកសម្រស់ថែមទៀតផង។ សណ្តែកក្រហមមិនត្រឹមមានប្រសិទ្ធភាពក្នុងការសម្រកទម្ងន់មួយមុខទេ តែវាក៏ជួយបញ្ចុះកម្តៅ បន្សាបជាតិពុលក្នុងខ្លួនផងដែរ។ សណ្តែកក្រហមមានសមត្ថភាពរារាំងការផលិតនិងបន្ថយជាតិពណ៌មេឡានីន បង្កើនល្បឿនការផលិតកូឡាជែន វាអាចជួយឲ្យស្បែករលោងនិងមានភាពយឺត។ ដោយឡែកវីតាមីន E ដែលមានក្នុងនោះ ក៏ជួយពន្យារភាពចាស់ និងជាសារធាតុប្រឆាំងអុកស៊ីតកម្មដ៏ល្អ ជួយឲ្យស្បែករលោងក្មេងជាងវ័យ។
សម្រាប់វិធីធ្វើវិញងាយស្រួលទេ ដោយអ្នកគ្រាន់តែយកសណ្តែកក្រហម ១ ក្តាប់តូច ប្រហែល ១០០ ក្រាម ហើយលាងវាឲ្យស្អាត។ ចាក់ទឹកប្រហែល ១,៥ លីត្រចូលទៅក្នុងឆ្នាំងហើយដាំឲ្យពុះ។ បន្ទាប់មកទុកទឹកឲ្យនៅក្ដៅឧណ្ណៗ សឹមដាក់សណ្តែកក្រហមចូល ដើម្បីឲ្យសារធាតុចិញ្ចឹមអាចជ្រាបចូលទៅក្នុងទឹកគ្រប់គ្រាន់។ ដាក់ទឹកនោះ ចូលដប ហើយទទួលទានជំនួសទឹកធម្មតារៀងរាល់ថ្ងៃ។
សូមបញ្ជាក់ថា អ្នកគួរទទួលទានវានៅពេលរសៀល ឬមុនអាហារពេលល្ងាច មិនគួរទទួលទានពេលព្រឹកព្រលឹមទេ។ យ៉ាងណាសម្រាប់រូបមន្តនេះ យើងខ្ញុំមិនណែនាំសម្រាប់អ្នកកើតជំងឺតម្រងនោម និងស្រ្តីមានផ្ទៃពោះឡើយ៕
