រាងកាយយើងត្រូវការទឹក ដើម្បីដំណើរការប្រក្រតី ប៉ុន្តែបើយើងញ៉ាំទឹកច្រើនជ្រុល នោះនឹងអាចបង្កជាគ្រោះថ្នាក់ធ្ងន់ធ្ងរទៅវិញ។ ពិតណាស់ ក្រុមអ្នកជំនាញណែនាំឲ្យយើងញ៉ាំទឹកឲ្យបាន៨កែវក្នុងមួយថ្ងៃ ហើយបរិមាណនៃការញ៉ាំទឹកប្រចាំថ្ងៃអាចមានការប្រែប្រួល អាស្រ័យទៅលើកត្តាបរិស្ថាន ការហាត់ប្រាណ លក្ខខណ្ឌសុខភាពដូចជាការមានផ្ទៃពោះ ឬការបំបៅដោះកូនជាដើម។ នៅពេលយើងញ៉ាំទឹកច្រើនជ្រុល តើមានបញ្ហាអ្វីខ្លះកើតឡើង?
ការញ៉ាំទឹកច្រើនពេក អាចនាំឲ្យយើងពុលទឹកឬរារាំងមុខងាររបស់ខួរក្បាល ពីព្រោះនៅពេលដែលបរិមាណទឹកច្រើនជ្រុលនៅក្នុងកោសិកា នឹងបង្កឲ្យមានការហើមកោសិកា ដែលធ្វើឲ្យយើងវង្វេងស្មារតី ងងុយគេង និងឈឺក្បាល។
ជាក់ស្ដែង សូដ្យូមជាអេឡិចត្រូលីត ដែលមានឥទ្ធិពលខ្លាំងពេលដែលយើងមានបរិមាណជាតិទឹកច្រើនជ្រុល ដោយនាំឲ្យយើងប្រឈមនឹងជំងឺសូដ្យូមក្នុងឈាមចុះទាប។ ក្នុងករណីជំងឺសូដ្យូមទាបក្នុងឈាមស្រួចស្រាល់ អាចបង្កជារោគសញ្ញាធ្ងន់ធ្ងរ ដូចជាហើមខួរក្បាល ធ្វើឲ្យសន្លប់ ឬអាចគ្រោះថ្នាក់ដល់អាយុជីវិតក៏មាន។
សញ្ញាបញ្ជាក់ថាយើងញ៉ាំទឹកច្រើនជ្រុលមានដូចជា ទឹកនោមមានពណ៌ថ្លា, នោមញឹកញាប់ជាងធម្មតាចង្អោរ ឬក្អួត, ឈឺក្បាលពេញមួយថ្ងៃ, ខ្សោយសាច់ដុំ និងងាយរមួលក្រពើ, អស់កម្លាំង និងនឿយហត់ជាដើម៕
