ត្រសក់ គឺជាបន្លែមួយប្រភេទសម្បូរទៅជាតិទឹក និងផ្ទុកនូវវីតាមីនជាច្រើនដូចជាវីតាមីន B1, B2, B3, B5, B6 ហ្វូលិក អាស៊ីត វីតាមីន C, ផូស្វ័រ, ប៉ូតាស្យ៉ូម, ម៉ាញ៉េស្យូម, ស័ង្កសី និងកាកសរសៃ Fiber។ វីតាមីន និងសារជាតិរ៉ែខនិជទាំងនោះ ទើបបានជាផ្លែត្រសក់ផ្ដល់អត្ថប្រយោជន៍ច្រើនយ៉ាងចំពោះសុខភាព។
ជាមួយគ្នានេះដែរ ប្រសិនបើយើងទទួលទានផ្លែត្រសក់ ១ ផ្លែក្នុងមួយថ្ងៃ យើងនឹងទទួលបាននូវអត្ថប្រយោជន៍ចំនួន ១២ យ៉ាង ដូចជា វាជួយផ្គត់ផ្គងជាតិទឹកក្នុងរាងកាយ, ជួយបណ្ដេញជាតិពុលតាមរយៈទឹកនោម និង ជួយថែរក្សាស្បែកឱ្យក្មេងជាងវ័យ។
ត្រសក់ក៏អាចជួយបន្ថយកម្រិតកូឡេស្តរ៉ូល ឬខ្លាញ់អាក្រក់ក្នុងរាងកាយ, ជំនួយដល់សរសៃសក់រឹងមាំ និងជម្រុញដល់ការលូតលាស់របស់សរសៃសក់។
វាជួយគ្រប់គ្រងសម្ពាធឈាម ដោយសារក្នុងត្រសក់មានជាតិកាកសរសៃ Fiber យ៉ាងច្រើន។ ត្រសក់ក៏ជួយសម្អាតធ្មេញ និងជួយពង្រឹងសុខភាពធ្មេញ អញ្ចាញរឹងមាំ, សម្រួលដល់ប្រព័ន្ធរំលាយអាហារ និង បន្ថយជាតិអាស៊ីតនៅក្នុងខ្លួន។
អត្ថប្រយោជន៍៤យ៉ាងទៀតដែលអ្នកនឹងទទួលបានប្រសិនបើអ្នកញ៉ាំផ្លែត្រសក់១ផ្លែជារៀងរាល់ថ្ងៃនេះគឺ វាជួយបង្កើនថាមពលដល់រាងកាយ នឹងធ្វើឱ្យអារម្មណ៍ស្រស់ថ្លា, ទប់ស្កាត់បញ្ហាប្រឈមនៃជំងឺមហារីក ជំនួយដល់ការសម្រកទម្ងន់ ,បង្កើត និងបង្កើនអាំងស៊ុយលីនជួយសម្រួលដល់អាការរបស់អ្នកជំងឺទឹកនោមផ្អែម ។
ដោយឡែក ផ្លែត្រសក់ត្រូវបានគេយកទៅផ្សំជាមួយគ្រឿងផ្សំធម្មជាតិផ្សេងៗទៀត ដើម្បីជំនួយដល់ផ្ទៃមុខ ភ្នែក និងស្បែកផងដែរ៕