ផ្កាឈូក ទាំងផ្កា ស្លឹក មើម ក្រអៅ ធ្លាប់ត្រូវបានគេដឹងថាមានផ្ទុកសារជាតិរ៉ែ និងវីតាមីនជាច្រើនដូចជា ប៉ូតាស្យូម, ជាតិដែក ម៉ង់កាណេស, ទង់ដែង, ផូស្វ័រ , ស័ង្កសី , ប្រូតេអ៊ីន, វីតាមីន C , វីតាមីន B6 ជាដើម។ ដូច្នេះហើយដើមផ្កាឈូកទាំងមូលសុទ្ធតែមានគុណប្រយោជន៍ច្រើនយ៉ាងមិនថាទាំងផ្នែកឱសថបុរាណព្យាបាលរោគ និងគុណប្រយោជន៍ជាអាហារូបត្ថម្ភជាច្រើន។ ក្រៅពីនេះ ផ្កាឈូកក៏មានអត្ថប្រយោជន៍ក្នុងការថែទាំសម្រស់របស់សុភាពនារីទាំងឡាយបានផងដែរ ពោលគឺជួយឱ្យផ្ទៃមុខសរ្ស់ស្អាត បង្រួមរន្ធញើស ផ្ទៃមុខតែងស្អាត ដោយវិធីងាយៗប៉ុណ្ណោះ។
គ្រឿងផ្សំដែលអ្នកត្រូវការមាន ផ្កាឈូក ១០ស្រទាប់ ទឹកដោះគោសុទ្ធគ្មានជាតិស្ករ ២ស្លាបព្រាបាយ និង ប្រេងអូលីវ ។
សម្រាប់ការអនុវត្តវិញគឺអ្នកគ្រាន់តែយកផ្កាឈូកមកបុកឱ្យហ្មត់ រួចលាយជាមួយទឹកដោះគោឱ្យក្លាយជាល្បាយជាការស្រេច។ លាងសម្អាតមុខឱ្យបានស្អាតជាមួយទឹកក្តៅឧណ្ហៗ រួចជូតមុខឱ្យស្ងួត។ យកម៉ាស់ផ្កាឈូកដែលបានបុករួច មកលាបឱ្យសព្វផ្ទៃមុខ និង-ក រួចទុកចោល ២០នាទី សឹមលាងមុខចេញជាមួយទឹកក្តៅឧណ្ហៗម្តងទៀតជាការស្រេច។ អ្នកក៏អាចលាបក្រែមផ្តល់សំណើមបន្ថែមក៏បានបន្ទាប់ពីប្រើប្រាស់ម៉ាស់នេះរួច វានឹងផ្តល់ប្រសិទ្ធភាពទ្វេរដង។ អាចអនុវត្ត ២ដង ក្នុងមួយសប្តាហ៍។
ម៉ាសធ្វើចេញពីផ្កាឈូកនេះអាចជួយធ្វើឱ្យស្បែកមុខរបស់អ្នក សខ្ចី ស្រស់ស្អាត ទន់ភ្លឺរលោង ក្មេងជាងវ័យ ពន្យារភាពចាស់ បន្តឹងស្បែកមុខ បង្រួមរន្ធញើស ថែមទាំងអាចកាត់បន្ថយ និងបំបាត់ស្បែកមុខខ្លាញ់បានយ៉ាងមានប្រសិទ្ធភាពទៀតផង៕